عزیزآباد میں 2 موٹرسائیکل پرسوار 4 مسلح ملزمان نے اندھا دھند فائرنگ کرکے ایک شخص کو قتل کردیا اور فرارہوگئے ۔

تفصیلات کے مطابق کراچی کے علاقے عزیز آباد بلاک 8 میں واقع تنظیم الانعام امام بارگاہ کے قریب 2 موٹر سائیکلوں پرسوار4 نامعلوم مسلح ملزمان نے ایک شخص پراندھا دھند فائرنگ کر دی اور فرار ہوگئے۔

 فائرنگ کے نتیجے میں موٹر سائیکل پر سوار شخص موقع پر ہی جاں بحق ہو گیا پولیس نے جائے وقوع سے نائن ایم ایم پستول کے 10 خول ،مقتولین کے پاس سے ایک پرانا موبائل فون اور موٹر سائیکل برآمد کرلییں۔

پولیس حکام کا کہنا ہے کہ مقتول کی شناخت عثمان کے نام سے ہوئی ہے جبکہ مقتول کا کریمنل ریکارڈ موجود ہے، 2013 اور 2014 میں اس کے خلاف ناجائز اسلحے کے دو مقدمات تھے۔

ابتدائی اطلاعات کے مطابق وہ پولٹری کے کاروبار سے وابستہ تھا جبکہ مزید تفصیلات کے لیے مقتول عثمان کے اہلخانہ کا انتظار کر رہے ہیں۔

پولیس کےمطابق مقتول کے جسم کے مختلف حصوں پر 12 گولیاں لگی ہیں اور مقتول کی عمر 25 سے 30 سال کے درمیان معلوم ہوتی ہے جبکہ پولیس کا کہنا ہےکے ابتدائی تفتیش کے مطابق فائرنگ کا واقعہ ٹارگٹ کلنگ کا شاخسانہ معلوم ہوتا ہے۔

 وزیراعلی سندھ نے واقعے کا نوٹس لیتے ہوئے پولیس چیف سے رپورٹ طلب کرلی۔

دوسری جانبگھگھر پھاٹک کے قریب فائرنگ سے دو افراد زخمی ہو گئے جبکہ سائٹ ایریا میں شہری اسٹریٹ کرائم کا نشانہ بن گیا۔