پاکستان میڈیا ریگولیٹری اتھارٹی کی جانب سے ٹی وی شوز میں میزبانی کرنے والے اینکرز کی دوسرے شوز میں بطور مہمان تجزیہ کار شرکت پر پابندی لگادی گئی ہے۔
تفصیلات کے مطابق پاکستان الیکٹرانک میڈیا ریگولیٹری اتھارٹی پیمرا نے ٹی وی چینلز کے مختلف پروگراموں میں ہونے والے تبصروں اور تجزیوں کے حوالے سے ایک ہدایت نامہ جاری کیا ہے، جس میں نیوز چینلز کو عدالت میں زیر سماعت مقدمات پر تبصروں سے اجتناب کی ہدایت کی گئی ہے۔
پیمرا کی جانب سے جاری ہدایت نامے کے مطابق ٹاک شوز میں عدلیہ اور ریاستی ادراوں کے خلاف یکطرفہ تجزیے اور پروپیگنڈے کی صورت میں متعلقہ ادارہ ذمہ دار ہو گا۔
ہدایت نامہ کے تحت ریگولر شوز کرنے والے اینکرز پر کسی دوسرے ٹاک شو میں جانے پر بھی پابندی عائد کردی گئی ہے جبکہ پیمرا نے عدلیہ یا اداروں سے متعلق غیرمناسب تجزیے اور منفی پروپیگنڈے نشر کرنے پر بھی ٹی وی چینلز کے خلاف کارروائی کا اعلان کردیا ہے۔
ہدایت نامے میں مزید کہا گیا ہے کہ ’ٹی وی چینلز عدالت میں زیر التوا معاملات پر کوئی بھی بحث، تجزیہ یا قیاس آرائی نشر نہیں کریں گے اور اپنے چینل کو عوام کو گمراہ کرنے کے لیے استعمال نہیں ہونے دیں گے۔
پیمرا کی جانب سے صحافیوں کے بطور تجزیہ کار دوسروں چینلوں پر آنے پر پابندی کو نہ صرف صحافی بلکہ انسانی حقوق کی تنظیمیں اور سیاسی جماعتیں تنقید بھی کا نشانہ بنا رہی ہے۔
وفاقی وزیر برائے سائنس اینڈ ٹیکنالوجی فواد چودھری نے اپنے ایک ٹوئٹ میں کہا کہ پیمرا کی جانب سے اینکرز پر پابندی کا نوٹیفکیشن بالکل غیر ضروری، غیر منطقی اور بلا ضرورت ہے۔
سابق وزیر خزانہ اور قومی اسمبلی کی قائمہ کمیٹی برائے خزانہ کے چیئرمین اسد عمر نے کہا کہ پیمرا کی جانب سے اینکر پر ٹی وی چینلز پر اپنی رائے کے اظہار سے روکنا حیرت انگیز فیصلہ ہے۔ پیمرا کواینکر پرسنز کے حقوق کو دبانے کے بجائے فیک نیوز کے خلاف کارروائی کا بہتر کام کرنا چاہیے۔
پاکستان مسلم لیگ(ن) کی ترجمان مریم اورنگزیب نے پیمرا کے حکم کی مذمت کرتے ہوئے نوٹس واپس لینے کا مطالبہ کیا۔
عمران صاحب یہ حکم ثبوت ہے کہ آپ جمہوری نہیں، آمرانہ فسطائی سوچ رکھتے ہیں،پیمرا اپنے ہی قانون کی خلاف ورزی کررہا ہے اینکرز پر پابندی کا پیمرا کے حکم کو فوری واپس لیا جائے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News