عدلیہ مخالف تقاریرکرنے پروزیراعظم عمران خان کےخلاف توہین عدالت کی درخواست لاہور ہائیکورٹ میں دائرکردی گئی۔

تفصیلات کے مطابق لاہورہائیکورٹ میں درخواست ایڈووکیٹ محمد فیضان نصیر چوہان اور طاہر مقصود بٹ نے دائر کی۔

 درخواست میں وزیراعظم پاکستان عمران خان کو فریق بنایا گیا ہےجس میں کہاگیاہے کہ وزیراعظم نےتقریر کرتے ہوئے عدلیہ کی کارکردگی پر تنقید کی۔

درخواستگزارنے کہاکہ وزیراعظم عمران خان نےتقریرکے ذریعےعدالتوں میں زیرسماعت اپوزیشن کے خلاف مقدمات پراثرانداز ہونے کی کوشش کی۔

درخواست گزارنے کہاکہ اعلیٰ عدلیہ کے ججز اوران کے فیصلے پرتنقید کرنا توہین عدالت کےزمرے میں آتا ہے،سپریم کورٹ نے 2013 میں عمران خان کو عدلیہ مخالف تقاریر کرنے پر توہین عدالت کا نوٹس جاری کیا تھا۔

درخواست گزارنے موقف اختیارکیاکہ عدلیہ مخالف بیان دینے پرسپریم کورٹ نے طلال چوہدری اور نہال ہاشمی سمیت دیگرسیاست دانوں کو سزائیں دی تھیں۔

درخواست گزار نے استدعا کی کہ عدلیہ مخالف بیان دینے پرعدالت وزیراعظم عمران خان کو پارلیمنٹ سےنااہل قرار دےاوروزیراعظم کے خلاف توہین کی کارروائی کا حکم دے کرانہیں ذاتی حیثیت میں طلب کرکے وضاحت مانگی جائے۔