شہباز شریف کی کرپشن پر وفاقی وزیر مواصلات و پوسٹل سروسز مراد سعید نے شہباز شریف سے پارلیمان میں صفائی پیش کرنے کا مطالبہ کردیا۔
تفصیلات کے مطابق مراد سعید نے اپنے ویڈیو پیغام میں کہنا تھا کہ بیرسٹر شہزاد اکبر نے شریفصاحب سے 18 سوال پوچھے ہیں اور پوری قوم شہباز شریف کی جانب سے جواب کی منتظر ہے۔
انہوں نے کہا کہ بڑے بھائی کیطرح ہم چھوٹے بھائی کو بھی موقع دیتے ہیں کہ پارلیمان میں آئیں اور بیرسٹر شہزاد اکبر کی جانب سے پوچھے گئے 18 سوالوں کا جواب دیں، بڑے بھائی کیطرح اگر شہباز شریف نے بھی پارلیمان میں جھوٹ بولا تو نتائج کے ذمہ دار خود ہوں گے۔
مراد سعید کا مزید کہنا تھا امید ہے اب خواجہ آصف بھی آپ کو یہ مشورہ نہیں دیں گے کہ قوم بھول جائے گی اور شہباز شریف صاحب قومی اسمبلی تشریف لائیں، قوم جواب کی منتظر ہے۔
وفاقی وزیر مواصلات نے مزید کہا کہ شہباز کہتے ہیں پارلیمان کومضبوط بنایا جائے، ہم معاملے کو ایوان میں لے جانے کیلئے تیار ہیں۔
ان کا کہنا تھا کہ یہ خیال ہے کہ قوم بھول جائے گی تو یاد رکھیں بھولنے نہیں دیں گے ، امید ہے خواجہ آصف بھی آپ کو بھولنے کا مشورہ نہیں دیں گے، شہباز شریف قومی اسمبلی تشریف لائیں، قوم جواب کی منتظر ہے۔
گذشتہ روز وزیراعظم کے معاون خصوصی برائے احتساب شہزاد اکبر نے کہا تھا کہ شہبازشریف کی کرپشن دھیلے کی نہیں،اربوں کی ہے، شریف خاندان نے جعلی ٹی ٹیوں کے ذریعے پیسہ باہر بھجوایا، شہبازشریف کے اثاثوں میں سترفیصد اور سلمان شہباز کے اثاثوں میں آٹھ ہزار گنا اضافہ ہوا۔
شہزاداکبر نےشہبازشریف کے سامنے اٹھارہ سوالات رکھتے ہوئے کہا تھا کہ ٹی ٹی نظام پوشیدہ نہیں،باہر سے پیسہ لانے کا ایک قانون بنایا گیا تھا، شریف خاندان نے جعلی ٹی ٹی کی رقم سے 32 سے 33 کاغذی کمپنیاں بنائیں، معصوم لوگوں کا نام استعمال کرکے ٹی ٹی اکاؤنٹس میں ڈالی گئیں، کاغذی کمپنیوں کا کنٹرول روم شریف دور میں وزیراعلیٰ سیکریٹریٹ تھا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News