اسلامک ریلیف ورلڈ وائڈ ( آئی آر ڈبلیو ) کے سی ای او کی وزیراعظم عمران خان سے ملاقات ہوئی۔

وزیراعظم نے پاکستان کی معاشی و سماجی ترقی میں آئی آر ڈبلیو کے کردار کی تعریف کی جبکہ وزیراعظم نے اسلامک ریلیف ورلڈ وائڈ کے سی ای او کو تمام شعبوں میں بلا تفریق کام کے حکومتی وژن سے آگاہ کیا۔

ملاقات میں وزیراعظم عمران خان کا کہنا تھا کہ اسلامک ریلیف ورلڈ وائڈ صحت، تعلیم اور آبی ماحولیات جیسے شعبوں میں کام کررہی ہے اور آئی آر ڈبلیو حکومت کے احساس پروگرام میں پارٹنر بنے۔

اس موقع پراسلامک ریلیف ورلڈ وائڈ کے سی ای او نے وزیراعظم کے وژن کی تعریف کرتے ہوئے کہا کہ آئی آر ڈبلیو حکومت پاکستان کے ساتھ مل کر پاکستان کی ترقی میں کردار ادا کرے گی۔

ملاقات کے اعلامیے میں کہا گیا کہ اسلامک ریلیف ورلڈ وائڈ کا ہیڈکوارٹر یو کے میں ہے جو 47 ممالک میں کام کررہی ہے جبکہ آئی آر ڈبلیو پاکستان میں 1992 سے پاکستان میں کام کررہی ہے۔

واضح رہے کہ اس سے قبل بھی وزیراعظم عمران خان کی زیر صدارت حکومتی معاشی ٹیم کا اجلاس ہوا تھا ، جس میں اجلاس میں ملکی معاشی صورتحال، اعلیٰ عدالتوں میں ایف بی آر سے متعلقہ زیر التوا کیسز کے حوالے سے پیش رفت کا جائزہ لیا گیا تھا۔

اجلاس میں ترقیاتی منصوبوں میں پیش رفت کا باقاعدگی سے جائزہ لینے کے لئے کیے جانے والے اقدامات پر بات چیت کی گئی جبکہ ایکسپورٹرز کے ٹیکس ریفنڈز کی ادائیگیوں، ترکمانستان افغانستان پاکستان انڈیا (ٹاپی) گیس پائپ لائن منصوبے میں پیش رفت، نان ٹیکس ریونیو بڑھانے کے سلسلے میں اقدامات پر بھی بریفنگ دی گئی تھی۔

بریفنگ دیتے ہوئے کہا گیا تھا کہ جولائی سے نومبر کے مہینوں کے لئے سامنے آنے والے اعدادوشمارکے مطابق برآمدات کے حجم اور ڈالر کے اعتبار سے آمدن میں اضافہ دیکھنے میں آیا ہے۔

وزیر اعظم کوبریفنگ دیتے ہوئے مزید کہا گیا تھا کہ برآمدات میں پچھلے سال کے مقابلے میں  اس سال اکتوبر کے ماہ میں چھ فیصد اضافہ جبکہ نومبر کے مہینے میں 9.6فیصد اضافہ سامنے آیا ہے۔