لاہور کے علاقہ امامیہ کالونی کے قریب فیکٹری میں سلنڈر پھٹنے سے آگ بھڑک اٹھی جس کے نتیجے میں 2 خواتین اور 2 بچوں سمیت 11 افرادجھلس کرجاں بحق ہوگئےجبکہ واقعے میں 2افراد کے زخمی ہونے کی اطلاعات ہیں۔

تفصیلات کے مطابق ریسکیو ذرائع نے بتایا کہ  پرفیوم بنانے والی فیکٹری میں سیلنڈر پھٹنے کے بعد آگ لگ گئی جس نے چند ہی پل میں پوری عمارت کو اپنی لپیٹ میں لے لیا۔

ریسکیو ذرائع نے بتایا کہ آگ کی شدت کے باعث فیکٹری کی عمارت کا کچھ حصہ بھی زمیں بوس ہوگیا۔

واقعے کے بعد اطلاع ملنے پرریسکیو کا عملہ موقع پر پہنچا اورامدادی آپریشن کرکے فیکٹری میں سے 2 خواتین سمیت 8 لاشوں اور 2 زخمیوں کو نکال لیا گیا جبکہ ایک شخص کو تشویشناک حالت میں میؤ اسپتال منتقل کردیا گیا۔

فیکٹری میں لگنے والی آگ کی شدت کے باعث ملحقہ مکانات بھی مکمل طور پر خالی کروا لیے گئے۔

واقعے میں جاں بحق ہونے والے 8 افراد میں سے 4 کی شناخت 65 سالہ زاہد، بیوی رشیدہ، 6 سالہ بیٹی اریبہ اور 9 سالہ موسیٰ کے نام سے ہوئی ہے۔

ریسکیو ذرائع کاکہناہے کہ  آتشزدگی پرمکمل طور پر قابو پا لیا گیا ہے، فائربریگیڈ کی 10 گاڑیوں نے آگ بجھانے کے عمل میں حصہ لیا، جبکہ لاشوں کو فیروز والا کے مردہ خانے منتقل کردیا گیا ہے۔