آرمی چیف کی مدت ملازمت میں توسیع سے متعلق آرمی ایکٹ میں ترمیم کا بل آج قومی اسمبلی میں پیش کئے جانے کا امکان ہے۔

تفصیلات کے مطابق قومی اسمبلی کا اجلاس آج ہوگا، اجلاس میں آرمی چیف جنرل قمر جاوید باجوہ کی مدت ملازمت میں توسیع سے متعلق آرمی ایکٹ میں ترمیم کا بل پیش کئے جانے کا امکان ہے۔

ذرائع کے مطابق اجلاس میں حکومت کی جانب سے آرمی ایکٹ میں ترمیم سےمتعلق بل پرحکمت عملی وضع کی جائے گی،بل پیش کرنے سے قبل حکومت اپوزیشن سے رابطہ کرے گی۔

وفاقی کابینہ نے آرمی ایکٹ میں ترمیم کی منظوری دے دی

اس کے ساتھ ساتھ پرویز خٹک کی سربراہی میں حکومتی کمیٹی اپوزیشن سے مشاورت کرے گی جبکہ ن لیگ کی مشترکہ پارلیمانی پارٹی کا اجلاس بھی طلب کرلیا گیا ہے۔

واضح رہے کہ گزشتہ دن وزیر اعظم عمران خان کے زیرِ صدارت ہونے والے خصوصی ہنگامی اجلاس میں وفاقی کابینہ نے آرمی ایکٹ میں ترمیم کے بل کی منظوری دی ۔

وزیراعظم کے زیرصدارت سنگل پوائنٹ ایجنڈا اجلاس میں آرمی ایکٹ میں ترمیم کے بل پر گفتگو کی گئی، سپریم کورٹ آف پاکستان کے حکم کے مطابق اس ترمیم میں  آرمی چیف کی مدت ملازمت اور توسیع کا طریقہ کار وضح کیا گیا ہے۔

وفاقی کابینہ کے ارکان نے منظوری سے قابل ایکٹ بل کا تمام پہلوؤں سے جائزہ لیا اوراس پر وزیراعظم کے ساتھ تمام پہلوؤں سے مشاورت بھی کی۔

مشاورت کے بعد کابینہ نے متفقہ طور پر آرمی ایکٹ میں ترمیم کے مسودے کی منظوری دی جس کے بعد اب اس ترمیم کو بحث کے لیے پارلیمنٹ میں پیش کیا جائے گا۔

 سپریم کورٹ آف پاکستان نے سابق چیف جسٹس آصف سعید کھوسہ کی سربراہی میں ہونے والی سماعت میں آرمی چیف کی مدتِ ملازمت میں استثنا کی قانونی حیثیت کے بارے استسفار کیا تھا۔

آئین میں اس حوالے سے واضح قانون نہ ہونے پر سپریم کورٹ نے آرمی چیف جنرل قمرباجوہ کو چھ ماہ کی عارضی توسیع کرتے ہوئے حکومت کو اس معاملے پر قانون سازی کی ہدایت کی تھی۔

عدالت نے وفاقی حکومت کو  پابند کرتے ہوئے کہا تھا کہ ایکٹ آف پارلیمنٹ کےذریعے 6 ماہ میں آرٹیکل 243 کی وسعت کا تعین کیا جائے۔

 گزشتہ ماہ آرمی چیف کی مدت ملازمت میں توسیع سے متعلق  سپریم کورٹ نے تینتالیس صفحات پر مشتمل تفصیلی فیصلہ جاری کیا تھا جسے جسٹس منصور علی شاہ نے تحریر کیا  تھا۔

جاری کردہ فیصلے کے مطابق تاریخ میں پہلی مرتبہ آرمی چیف کی تعیناتی اور ریٹائرمنٹ کا معاملہ سامنے آیا ہے جبکہ آرمی چیف کی مدت ملازمت کی قانون میں کوئی گنجائش نہیں ہے جبکہ آرمی چیف کی مدت ملازمت میں توسیع سے متعلق وزیراعظم، صدر مملکت اور وزارت دفاع کی سمریاں بے معنی ہیں۔

فیصلے میں کہا گیا تھا کہ مستقبل کے لیے آرمی چیف کی توسیع کا معاملہ پارلیمان کے سپرد کررہے ہیں ۔

فیصلے میں مزید کہا کہ قانون نہ ہونے سے کسی بھی جنرل کی مدت ملازمت پر غیریقینی دور کرنے کے لیے ایسی پریکٹس کی جاسکتی ہے، اگر قانون نہ بن سکا تو 6 ماہ کی مدت ختم ہونے پرجنرل قمر جاوید باجوہ ریٹائر ہوجائیں گے