پاکستانی وزیر خارجہ شاہ محمود قریشی نے بتایا ہے کہ ٹرمپ نے  وزیر اعظم عمران خان سے ملاقات میں جلد پاکستان کا دورہ کی یقین دہانی کرائی ہے۔

تفصیلات کے مطابق ڈیوس میں وزیراعظم عمران خان اور امریکی صدر ڈونلڈ ٹرمپ  کی ورلڈ اکنامک فورم کی ذیلی ملاقات ہوئی۔

اس ملاقات کے حوالے سے وزیر خارجہ شاہ محمود قریشی کا کہنا تھا کہ ٹرمپ نے  وزیر اعظم عمران خان سے ملاقات میں جلد پاکستان کا دورہ کی یقین دہانی کرائی ہے۔

اس ہی ملاقات میں پاکستان کے وزیراعظم نے ایف اے ٹی ایف  اجلاس کے دوران امریکی تعاون کی درخواست بھی کی ہے۔

ملاقات کے حوالے سے وزیرخارجہ کا مزید کہنا تھا کہ ملاقات کے دوران اور بھی اہم امور زیر بحث آئے۔

شاہ محمود قریشی نے بتایا کہ وزیراعظم عمران خان اور صدر ٹرمپ کی ملاقات تعمیری رہی ہے۔

ملاقات میں صدر ڈونلڈ ٹرمپ نے ایک بار پھر تنازعہ کشمیر کے سلسلے میں اپنا کردار ادا کرنے کی پیشکش کی ہے۔

وزیراعظم کی امریکی صدر ڈونلڈ ٹرمپ سے ملاقات

صدر ڈونلڈٹرمپ نے کہا کہ وہ وزیراعظم عمران خان سے تنازعہ کشمیر پر تبادلہ خیال کریںگے انہوں نے کہا کہ پاکستان اور امریکہ کے درمیان اچھے تعلقات قائم ہیں اور دونوں ممالک کے درمیان آج جیسے قریبی تعلقات کبھی نہیں رہے۔

ڈونلڈٹرمپ نے کہا کہ عمران خان ان کے دوست ہیں اور ان سے دوبارہ ملکر انہیں خوشی ہوئی ہے۔

اس موقع پر وزیراعظم عمران خان نے کہا کہ پاکستان خطے میں امن کا خواہاں ہے اور علاقائی امن واستحکام کیلئے اپنا کردار ادا کرتا رہے گا۔

انہوں نے کہا کہ افغان مسئلہ پر امریکی صدر سے تبادلہ خیال کیا جائیگا۔

اس سے قبل وزیراعظم عمران خان عالمی اقتصادی فورم کے سالانہ اجلاس میں شرکت کیلئے ڈیووس پہنچے۔

اس دورے کے دو بنیادی پہلوؤں میں عالمی اقتصادی فورم کے خصوصی اجلاس سے وزیراعظم کا کلیدی خطاب اور پاکستان تذویراتی مکالمے کے تحت مختلف اداروں کے سربراہوں اورتجارتی شعبے کے رہنماؤں کے ساتھ ان کی ملاقاتیں شامل ہیں۔