سپیکر پنجاب اسمبلی چوہدری پرویز الٰہی نے کہا ہے کہ کشمیری عوام کے لیے پاکستان کا بچہ بچہ جان نچھاور کرنے کو تیار ہے ، کشمیریوں کی سفارتی اور اخلاقی مدد ہر سطح پر جاری رہے گی۔

تفصیلات کے مطابق کشمیر کمیٹی پنجاب کے زیر اہتمام کشمیریوں کے ساتھ اظہار یکجہتی کے لئے شروع کی گئی آن لائن دس لاکھ دستخط مہم کے لئے سپیکر پنجاب اسمبلی چوہدری پرویز الٰہی نے دستخط کردیے۔

چیئرمین کشمیر کمیٹی پنجاب و صوبائی وزیر قانون راجہ بشارت بھی اس موقع پر موجود تھے۔

ذرائع کا کہنا تھا کہ اس مہم میں اب تک پونے دولاکھ افراد نے آن لائن دستخط کیے ہیں جبکہ ڈپٹی سپیکرسردار دوست محمد مزاری، وزیر ماحولیات رضوان احمد اور دیگر اراکین اسمبلی نے بھی آن لائن دستخط کیے۔

 چوہدری پرویز الٰہی  نے کہا کہ کشمیری بھائیوں کے ساتھ ہونے والے بھارتی مظالم کی جتنی مذمت کی جائے کم ہے جبکہ پوری پاکستانی قوم اور ساری سیاسی جماعتیں کشمیری بھائیوں کی حمایت میں متحد ہیں۔

سپیکر پنجاب اسمبلی چوہدری پرویز الٰہی  نے مزید کہا کہ وفاقی حکومت کی جانب سے صوبوں کو کشمیریوں کی حمایت میں شامل کرنا خوش آئند امر ہے، تمام اراکین صوبائی اسمبلی بلا تفریق آن لائن دستخط کر کے کشمیریوں سے یکجہتی کا اظہار کریں۔

 اس موقع پر صوبائی وزیر قانون راجہ محمد بشارت نے  کہا کہ پنجاب کے تمام عوام کشمیری بھائیوں کے ساتھ اظہار یکجہتی کے لیے آن لائن ملین سگنیچر مہم کو کامیاب بنائیں۔

راجہ محمد بشارت نے مزید کہا کہ کشمیر کمیٹی پنجاب 5 فروری کو بھر پور طریقے سے یوم یکجہتی کشمیر منائے گی جبکہ صوبے بھر میں کشمیریوں کی حمایت میں ریلیاں اور دیگر پروگرام منعقد کیے جائیں گے۔

یاد رہے کہ مقبوضہ کشمیر میں بدترین لاک ڈاؤن جاری ہے ، کشمیری عوام تین ماہ سے زائد عرصے سے قیدیوں کی زندگی گزارنے پر مجبور ہیں۔

وادی مقبوضہ کشمیر کی سڑکیں سنسان، دکانیں بند، کاروباری مراکز پر تالے پڑے ہیں، مسلسل کرفیو کے باعث کاروبار زندگی درہم برہم، گلیوں اورسڑکوں پر بھارتی فوج کا گشت، گھروں کے باہر بھی فوجی تعینات، گھروں میں محصورافراد کو اپنے رشتہ داروں کے جنازے تک پڑھنے کی بھی اجازت نہیں،اسکول بند ہیں، اسپتالوں میں ڈاکٹرز کا پہنچنا دشوار ہوگیا، طبی امداد نہ ملنے سے مریضوں کی زندگیاں بھی داؤ پر لگ گئیں، ہر روز سات سے آٹھ افراد کو دل کا دورہ پڑرہا ہے لیکن علاج معالجے کی کوئی سہولت میسرنہیں۔