وزیر خارجہ شاہ محمود قریشی نے کہا ہے کہ ریاستی جبر سے کشمیریوں کی آواز کو دبایا نہیں جا سکتا ہے۔

تفصیلات کے مطابق وزیر خارجہ مخدوم شاہ محمود قریشی سے آل پارٹیز حریت کانفرنس کے رہنماؤں کی ملاقات ہوئی ہے۔

آل پارٹیز حریت کانفرنس کے وفد میں سید عبداللہ گیلانی، سید فیض احمد نقشبندی اور حریت لیڈر یسین ملک کے نمائندے رفیق ڈار سمیت آل پارٹیز حریت کانفرنس کے اہم قائیدین شامل تھے۔

۔ وفاقی وزیر برائے امور کشمیر علی امین گنڈا پور بھی اس ملاقات میں موجود تھے

وزیر خارجہ مخدوم شاہ محمود قریشی نے وزارت خارجہ آمد پر حریت رہنماؤں کو خوش آمدید کہا اور وزیر خارجہ نے حریت قائدین کو وزیر اعظم آزاد جموں کشمیر راجہ فاروق حیدر اور آزاد کشمیر کے دیگر پارلیمانی رہنماؤں سے ہونیوالی حالیہ ملاقات اور اس ملاقات میں کشمیر کی صورتحال پر کی جانے والی تفصیلی مشاورت سے آگاہ کیا گیا۔

حریت کانفرنس کے وفد نے بھارت سرکار کی جانب سے مقبوضہ کشمیر میں کیۓ گئے جابرانہ و یکطرفہ اقدامات ، غیر انسانی لاک ڈاؤن، مواصلاتی بندش، بھارتی قابض افواج کے ظلم و ستم اور بنیادی انسانی حقوق کی پامالیوں کو عالمی سطح پر اجاگر کرنے کے لئے حکومت پاکستان اور  بالخصوص وزیر اعظم عمران خان اور وزیر خارجہ کی ذاتی کاوشوں کو سراہا ۔

آل پارٹیز حریت کانفرنس کے رہنماؤں سے ملاقات میں شاہ محمود قریشی نے کہا کہ  ہندوتوا کی سوچ  پر عمل پیرا، مودی سرکار کا اصل  چہرہ  پوری دنیا کے سامنے بے نقاب ہو چکا ہے۔

انہوں نے کہا کہ پاکستان ہر سطح اور ہر فورم پرکشمیریوں کی آواز بلند کرتا رہے گا کیونکہ گذشتہ چھ ماہ سے، مقبوضہ جموں و کشمیر میں بھارتی جبرو استبداد کا شکار، مظلوم کشمیریوں کی سسکیاں عالمی ضمیر کو جھنجھوڑ رہی ہیں۔

وزیر خارجہ کا کہنا تھا کہ کشمیریوں کو حق خود ارادیت ملنے تک پاکستان ہر محاذ پر کشمیریوں کی اخلاقی، سفارتی اور سیاسی حمایت جاری رکھے گا۔

وفد نے مسئلہ کشمیر کو عالمی سطح پر مزید اجاگر کرنے کے حوالے سے وزیرِ خارجہ کو تجاویز بھی پیش کیں۔