امیر جماعت اسلامی سراج الحق نے کہا ہے کہ موجودہ حکمرانوں نے عوام کی مشکلات اور پریشانیوں میں اضافہ کر دیا ہے ۔

تفصیلات کے مطابق امیر جماعت اسلامی سراج الحق نے اپنے ایک بیان میں عمران خان پر تنقید کرتے ہوئے کہا ہے کہ حکومت نے معیشت کو عملاً آئی ایم ایف ، اوگرا اور نیپرا کے حوالے کردیا گیا ہے

سراج الحق نے کہا کہ حکومت اور ریاست ایک پیج پر ہے تو عوام کو ریلیف کیوں نہیں مل رہا ، عوام مہنگائی اور بے روزگاری سے تنگ ہیں۔

امیر جماعت اسلامی نے یہ بھی کہا کہ ملک سیاسی بحران سے دوچار ، اسٹیبلشمنٹ کے کردار پر انگلیاں اٹھ رہی ہیں  جبکہ وزیراعظم خود کو بے بس اور بے اختیار سمجھتے ہوئے بار بار اپنی مجبوریوں کا اظہار کرتے ہیں ۔

سراج الحق کا کہنا تھا کہ قیام پاکستان سے لے کر آج تک ملکی آئین پر اس کی روح کے مطابق عملدرآمد نہیں ہوسکا ، کل تک حکومت کو موقع دینے کی بات کرنے والے اب اس سے نجات کی دعائیں کر رہے ہیں ۔

امیر جماعت اسلامی سراج الحق کا مزید کہنا تھا کہ20 فروری سے مہنگائی اور بے روزگاری کے خلاف ملک گیر تحریک کا آغاز کر رہے ہیں ، ملک بھر میں جلسے جلوس اور مظاہر ے ہوں گے ۔

حکومت کی غلط پالیسیوں نے عوام کو نان شبینہ کا محتاج بنادیا ، سراج الحق

واضح رہے کہ اس سے قبل بھی  سراج الحق نے لاہور میں تقریب سے خطاب کرتے ہوئے کہا  تھا کہ وزیراعظم کے قوم سے وعدے ہوا میں تحلیل ہو گئے ہیں، موجودہ حکومت وینٹی لیٹر پر ہے مصنوعی سانس سے کب تک زندگی بچائی جائے گی ۔

سراج الحق نے کہا تھا کہ وزیراعظم نے اعلان کیا تھاکہ حکمرانوں کے سونامی نے لوگوں سے روزگار ، چھت اور اب نوالہ چھیننا شروع کردیا ہے ۔

امیر جماعت اسلامی سراج الحق نے مزید کہا تھا کہ حکومت کی غلط پالیسیوں نے عوام کو نان شبینہ کا محتاج بنادیا ہے، حکومت کو ووٹ اور سپورٹ دینے والے سب کو مشکلات  کا سامنا ہیں ۔