پیپلز پارٹی کے چیئر مین بلاول بھٹو نے حکومت پر سخت تنقید کرتے ہوئے کہا ہے کہ حکومت کا آئی ایم ایف سے معاہدہ نااہلی اور نالائقی ہے۔

تفصیلات کے مطابق لاہور میں میڈیا سے گفتگو کرتے ہوئے انہوں نے کہا کہ آئی ایم ایف سے بے شک ڈیل کریں مگر غریب عوام سے سودے بازی نہ کرے۔

بلاول کا کہنا تھا کہ پاکستان کی معاشی خود مختاری پر سودے بازی کی ہے، پی ٹی آئی نے جو خواب دکھائے وہ پرانے پاکستان میں رہ گئے ہیں اور اب حکومت معیشت کی جان نکال رہی ہے۔

بلاول نے کہا کہ حکومت نے آئی ایم ایف کی ساری شرائط تسلیم کیں، پاکستان پیپلز پارٹی کے دور میں بھی ہم آئی ایم ایف کے پاس گئے، تاہم اس کے لیے ہمارے پاس مربوط حکمتِ عملی تھی۔

سپریم کورٹ نے سرکلر ریلوے 6 ماہ میں چلانے کا حکم دے دیا

انہوں نے کہا کہ حکومت نے آئی ایم ایف کو اہداف سے متعلق غلط بتایا، حکومت  سے مذاکرات میں ٹیکس وصولی کا غلط ہدف دیا۔

انہوں نے کہا کہ 50 لاکھ گھر، ایک کروڑ نوکریاں دینے کا وعدہ کیا گیا تھا، انکروچمنٹ کے نام پر گھر گرائے جا رہے ہیں، ہر شعبہ میں لوگوں کو بے روزگار کیا جا رہا ہے۔

چیئرمین پی پی پی نے کہا کہ کل وزیرِ اعظم نے سیکیورٹی اداروں کو مہنگائی کی تحقیقات کرنے کا کہا ہے، کیا ہماری حکومت اتنی نا اہل ہے کہ سیکیورٹی اداروں سے تحقیقات کرائے گی۔

انہوں نے کہا کہ حکومت بے نظیر انکم سپورٹ پروگرام کو نقصان پہنچا رہی ہے، حکومت بے نظیر انکم سپورٹ پروگرام سے لوگوں کو فارغ کر رہی ہے۔

انہوں نے یہ بھی کہا کہ سیاسی مفاد اور انا کی وجہ سے غریب عوام سے کھیلا جا رہا ہے، یہ نالائقی کا ثبوت ہی ہے کہ ان کے پاس کوئی پلان تھا نہ پتا تھا کہ جانا ہے یا نہیں، ٹیکس نیٹ میں نہ ہونےکا مطلب چور اور ڈاکو ہونا نہیں۔