مشکل وقت میں چین کی جانب سے ایک مرتبہ پھر پاکستان کی مدد کرنے میں پہل کردی گئی ہے۔

تفصیلات کے مطابق سیندک پراجیکٹ میں کام کرنے والی چینی کمپنی نے کورونا وائرس سے نمٹنے کے لیے بلوچستان حکومت کو طبی آلات کی بڑی کھیپ حوالے کردی۔

چین کے سرکاری کمپنی میٹلورجیکل کمپنی آف چائنا (ایم سی سی) کی جاری کردہ پریس ریلیز کے مطابق ایم سی سی نے کورونا وائرس کی تدارک کے لیے جو طبی آلات حکومت بلوچستان کے حوالے کردیئے ان میں دو لاکھ ماسک، چار ہزار ٹیسٹ کٹس، حفاظتی کپڑوں کے دو ہزار جوڑے، دو ہزار جوڑے دستانے، دو ہزار حفاظتی عینک اور ایک سو تھرمامیٹر بھی شامل ہیں جنہیں کوئٹہ میں پی ڈی ایم اے حکام کے حوالے کیا گیا۔

بیان کے مطابق مشکل وقت نے پاک چین دوستی کا نیا مظاہرہ دیکھا، کورونا وائرس کے خلاف ایم سی سی نے پاکستانی عوام کی مدد جاری رکھتے ہوئے اپنے ذیلی کمپنی ایم آر ڈی ایل کی توسط سے 27 مارچ کو چاغی کے علاقے سیندک کے 6 محلوں میں خوردنی اشیاء تقسیم کی اور وزیراعلی بلوچستان کی ہدایت پر چاغی بھر میں لوگوں کو راشن فراہم کرنے کے لیے صوبائی حکومت سے مشاورت کی جارہی ہے۔