وزارت خزانہ نے اعلامیہ جاری کرتے ہوئے تھنک ٹینک کے اجلاس میں کہا ہے کہ حکومت سمندر پار پاکستانیوں کو ڈیجیٹل اکاؤنٹ کی سہولت دینے کی تیاری کررہی ہے۔

تفصیلات کے مطابق وزیر اعظم کے معیشت پر قائم کئے گئے تھنک ٹینک کا اجلاس مشیر خزانہ عبدالحفیظ شیخ کی صدارت میں ہوا، اجلاس میں گورنر اسٹیٹ بینک بھی شریک ہوئے، اجلاس میں سوشل سیفٹی نیٹ کی کمیٹی نے اجلاس کے شرکاء کو بریفنگ دی گئی۔

اعلامیہ کے مطابق پاکستان بناؤ سرٹیفیکیٹ پر بھی اجلاس میں بریفنگ دی گئی اور چھوٹے و درمیانے درجے کے کاروباروں کے قرضے بڑھانے کی ایجنڈا پیش کیا گیا۔

وزارت خزانہ کے جاری کردہ اعلامیے میں ہاؤسنگ فنانس بڑھانے کی تجویز اجلاس میں پیش کی گئی  اور ایسی تمام اسکیموں کو ایف اے ٹی ایف قواعد کے مطابق ڈھالنے کی تجویز بھی سامنے آئی ہے۔

وزارت خزانہ نے بتایا کہ ڈیٹا کی تصدیق پر لاگو نادرا فیس کم کرنے تجویز بھی اجلاس کے شرکاء کی جانب سے پیش کی گئی جبکہ احساس پروگرام کا دائرہ کار بڑھانے پر اجلاس کو بریفنگ بھی دی گئی۔

وزارت کا کہنا ہے کہ وزیر اعظم کے معیشت پر قائم کئے گئے تھنک ٹینک کے اجلاس میں نیا پاکستان ہاؤسنگ اتھارٹی پر پیش رفت سے آگاہ کیا گیا جبکہ تھنک ٹینک کی نئی رپورٹ وزیر اعظم کو جلد پیش کرنے کی ہدایت بھی کی گئی ہے۔