قومی احتساب بیورو (نیب ) کی ٹیم مسلم لیگ ن کے صدر شہباز شریف  کی تلاش میں جاتی امرا روانہ ہوگئی ہے۔

تفصیلات کے مطابق نیب کی  دیگر ٹیمیں دیگر مختلف جگہوں پر بھی شہباز شریف کی گرفتاری کے  لیے روانہ کردی گئی ہیں۔

اس سے قبل  قومی احتساب بیورو (نیب ) کی ٹیم مسلم لیگ ن کے صدر شہباز شریف کی ماڈل  ٹاؤن والی رہاش گا ہ میں داخل ہوگئی  تھی  تاہم  شہباز شریف ماڈل ٹاؤن میں اپنی رہائش گاہ 96 ایچ میں موجود  نہیں تھے ۔

ذرائع کا کہنا تھا کہ شہباز شریف صبح 9بجے  ہی رہائش گاہ سے روانہ ہوگئے تھے۔شہبازشریف رہائش گاہ کے پچھلے گیٹ سے روانے ہوئے تھے۔

مسلم لیگ ن کی رہنما عظمیٰ بخاری اور مریم اورنگزیب بھی ماڈل ٹاؤن پہنچ گئی تھی  جبکہ پولیس کی بھاری نفری بھی شہباز شریف کی رہائش گاہ کے باہر موجود تھی۔

دوسری جانب نیب کو شہباز شریف کی جانب سے بھجوایا گیا تحریری جواب موصول ہوگیا ہے۔ نیب نے شہباز شریف کے جواب کا جائزہ لینا شروع کر دیا ہے۔

شہباز شریف نے تحریری جواب میں لکھا ہے کہ  69 سال کی عمر ہے اور کینسر کا مریض ہوں ،  کورونا خدشات کے باعث میں پیش نہیں ہوسکتا ۔ مجھ سے ویڈیو لنک اور اسکائپ کے ذریعے نیب جواب لے سکتا ہے ۔

واضح رہے کہ نیب نے شہباز شریف کو آمدن سے زائد اثاثہ جات کیس میں  طلب کیا تھا۔