وزیر اعلیٰ سندھ سید مراد علی شاہ  نے عوام سے درخواست کی ہے کہ برائے مہربانی احتیاطی تدابیر پر لازمی طور پر عمل کریں۔

وزیراعلیٰ سندھ سید مراد علی شاہ نے  کورونا وائرس کی موجودہ صورتحال سے متعلق اپنے بیان میں عوام  سے احتیاطی تدابیر اپنانے کی درخواست کرتے ہوئے کہا کہ  آپ کی احتیاط نہ صرف آپ کو بلکہ دیگر لوگوں کو  بھی محفوظ بنائےگی۔

وزیر اعلیٰ سندھ کا کہنا تھا کہ کورونا وائرس کی صورتحال صوبے بھر میں خطرناک شکل اختیار کرتی جا رہی ہے۔ گذشتہ24 گھنٹوں میں انتقال کرنے والوں کی تعداد 36 ہے  جس کے بعد صوبے میں انتقال کرنے والوں کی تعداد 1713 ہوگئی ہے۔

مراد علی شاہ نے کہا  کہ گذشتہ 24 گھنٹوں میں 10276 ٹیسٹ کیے گئے  ہیں جن میں سے  آج 1468 نئے کیسز سامنے آئے ہیں ۔  کراچی میں آج  592 نئے کیسز سامنے آئے ہیں۔

انہوں نے بتایا کہ صوبے میں مجموعی طور پر اب تک 553676 ٹیسٹ ہوچکے ہیں جن میں سے 102368 کیسز مثبت آئے ہیں ۔

وزیر اعلیٰ سندھ نے مزید بتایا کہ  سندھ میں اس وقت 41490 مریض زیر علاج ہیں جن میں سے  39589 گھروں  میں ،400 مریض آئسولیشن مراکز میں جبکہ 1231 مریض مختلف اسپتالوں میں زیر علاج ہیں۔

مراد علی شاہ نے بتایا کہ  آج 1069 مریض تشویشناک حالت میں ہیں جن میں سے  اس وقت 113 مریض وینٹی لیٹرز پر ہیں۔

ان کا کہنا تھا کہ  آج مزید 1538 مریض صحتیاب ہوکر عام زندگی کی طرف لوٹ گئے ہیں جس کے بعد اب تک صحتیاب ہونے والے مریضوں کی تعداد 59165 ہوگئی ہے۔