سیکرٹری خارجہ امور سہیل محمود نے اپنی ہسپانوی ہم منصب کو یورپی یونین کی جانب سے پی آئی اے کی پروازوں کی عارضی معطلی پر تحفظات سے آگاہ کرتے ہوئے اس فیصلے پر نظرثانی کا مطالبہ کیا ہے۔

تفصیلات کے مطابق ترجمان دفتر خارجہ عائشہ فاروقی نے کہا ہے کہ سیکرٹری خارجہ امور سہیل محمود کا ہسپانیہ کی سیکرٹری خارجہ کرسٹینا گالاچ سے ویڈیو کال پر رابطہ ہوا ہے جس میں دونوں رہنماؤں کا کورونا سے نمٹنے، دوطرفہ تعلقات اور تجارت، کثیرجہتی فورمز پر قریبی تعاون اور علاقائی صورتحال سمیت متعدد امور پر تبادلہ خیال کیا۔

ترجمان دفتر خارجہ کے مطابق سیکرٹری خارجہ نے اپنی ہسپانوی ہم منصب سے سپیین میں کورونا سے ہونے والے قیمتی انسانی جانوں کے نقصان پر دلی تعزیت کرتے ہوئے اسپین کے کورونا وائرس کو محدود رکھنے ملکی معیشت کی بحالی پر اقدامات کی تعریف کی۔

سہیل محمود نے اپنی ہسپانوی ہم منصب کرسٹینا گالاچ کو پاکستان کی جانب سے انسانی جانیں بچانے،  کاروبار زندگی کے تحفظ اور معیثت کی بحالی کے اقدامات سے آگاہ کیا۔

دونوں فریقین نے کورونا وباء کے معاشرتی و اقتصادی پہلووں پر تبادلہ خیال کیا۔

سیکرٹری خارجہ نے کرسٹینا گالاچ کو قرضوں میں آسانی کے عالمی اقدامات اور ملکی ریلیف پیکج سے بھی آگاہ کیا اور یورپی یونین اور جی 20 میں پاکستان کی حمایت کرنے پر اسپین کا شکریہ ادا کیا۔

انہوں نے اسپینش سیکرٹری خارجہ کو یورپی یونین کی جانب سے پی آئی اے کی پروازوں کی عارضی معطلی پر تحفظات سے آگاہ کرتے ہوئے اس فیصلے پر نظرثانی کا مطالبہ کیا۔

فریقین نے باہم تجارت اور اقتصادی تعلقات کے فروغ پر بھی بات چیت کی۔

عائشہ فاروقی کا کہنا تھا کہ سیکریٹری خارجہ نے مقبوضہ کشمیر میں انسانی حقوق کی پامالی اور انسانی المیہ کو اجاگر کیا اور پاکستان کے تحفطات بیان کئے۔

ترجمان دفتر خارجہ نے بتایا کہ سہیل محمود نے کہا کہ بھارتی قابض افواج کی جانب سے ایل او سی پر جنگ بندیوں میں اضافہ ہوا ہےجو کہ خطے میں امن وسلامتی کے لئے بڑے خطرات ہیں پاکستان نے عالمی برادری سے کہا ہے کہ وہ کشیدگی میں کمی اور اقوام متحدہ کی قراردادوں کے مطابق مسئلہ کشمیر کے پرامن حل میں سہولت کاری میں اپنا کردار ادا کرے۔