وفاقی حکومت کی جانب سے دوہری شہریت کے حامل پاکستانیوں کو الیکشن لڑنے کی اجازت دینے کا فیصلہ کرلیا گیا ہے۔

تفصیلات کے مطابق وفاقی کابینہ نے دوہری شہریت کے حامل پاکستانیوں کو الیکشن لڑنے کی اجازت دینے بارے بل منظور کرلیا ہے۔

اس ضمن میں وفاقی کابینہ کی جانب سے آئین کے آرٹیکل 63 ون سی تبدیل کرنے کے لیے آئینی ترمیم بل کی منظوری دی گئی ہے جبکہ وفاقی کابینہ کی منظوری کے بعد آئینی ترمیمی بل وزارت پارلیمانی امور کو ارسال کردیا گیا ہے۔

ترمیمی بل کے مطابق دوہری شہریت کے حامل افراد کو حلف اٹھانے سے قبل غیرملکی شہریت ترک کرنا ہوگی۔

یاد رہے کہ کابینہ کمیٹی برائے قانونی کیسز نے دوہری شہریت رکھنے والوں کو الیکشن لڑنے کی اجازت کی مخالفت کی تھی جبکہ بعض وزراء کی جانب سے بھی دوہری شہریت رکھنے والوں کو الیکشن لڑنے کی اجازت دینے کی مخالفت کی گئی۔

یاد رہے کہ اس سے قبل وزیراعظم کے معاون خصوصی ذلفی بخاری کا کہنا تھا کہ اوورسیز پاکستانیوں کی آسانی کے لیے قوانین بنا رہے ہیں۔

ذلفی بخاری نے اپنے ایک بیان میں کہا کہ سمندر پار پاکستانیوں کو مزید سہولتیں فراہم کریں گے، جب اوورسیز پاکستانی وطن آئیں گے تو آسانی سے چھٹیاں گزار سکیں گے۔

معاون خصوصی نے کہا کہ اوورسیز پاکستانیوں کے زمین کے تنازعات کے لیے خصوصی اقدامات کر رہے ہیں، وزیراعظم نے کہا ہے کہ سمندر پار پاکستانیوں کے مسائل کو حل کیا جائے۔

انہوں نے مزید کہا کہ 2 ہفتوں میں اوورسیز پاکستانیوں کے مسائل کے حل کے لیے قوانین سازی پر کام کرلیں گے۔