الیکشن کمیشن کی ٹیلی ہیلپ لائن سروس کا باقاعدہ افتتاح کردیا گیا ہے جو عام لوگوں کو معلومات فراہم کرنے میں معاونت فراہم کرے گی۔

تفصیلات کے مطابق چیف الیکشن کمشنر سکندر سلطان راجہ نے الیکشن کمیشن کی ٹیلی ہیلپ لائن سروس کا افتتاح کیا گیا ہے۔

یہ ہیلپ لائن  پہلے سے ریکارڈ شدہ صوتی پیغامات  پر مبنی سروس ہے جو عام لوگوں کو معلومات فراہم کرنے میں معاونت فراہم کرے گی اور اس کا استعمال کر کے  کالر الیکشن کمیشن کی ہیلپ لائن نمبر051-8848888 ملا کر ٹیلی کمپیوٹرائزڈ سسٹم سے رسپانس حاصل کرسکتے ہیں۔

یہ سہولت اردو اور انگریزی دونوں زبانوں میں عام طور پر پوچھے جانے والے سوالات کے پہلے سے ریکارڈ شدہ صوتی جوابات پر مشتمل ہے۔

چیف الیکشن کمشنر نے قوم کو پیغام دیتے ہوئے کہا ہے کہ الیکشن کمیشن ترقی پسند ادارہ ہونے کے ناطے جدید ٹیکنالوجی کے استعمال کے ساتھ عوام کا اعتماد حاصل کرنے لئے اسٹیک ہولڈرز کے دروازے پر آگاہی مہم کو بڑھانے کے لئے ہمیشہ کوشاں رہے گا۔

انہوں نے مزید کہا   کہ اس کے تیسرے پانچ سالہ اسٹریٹجک پلان (2019-2023) کے مطابق الیکشن کمیشن آف پاکستان کی ٹیلی ہیلپ لائن سروس یقیناً لاکھوں موبائل اور ٹیلیفون صارفین کے لئے ملک بھر میں مفید ثابت ہوگی۔

چیف الیکشن کمشنر نے ٹیلی ہیلپ لائن سروس شروع کرنے کی کوشش کو سراہا اور مزید ہدایت دی کہ مستقبل میں کال سنٹر کی سروس کو بھی اسی سروس سے منسلک کر دیا جائے تاکہ عام عوام براہ راست الیکشن کمیشن کے نمائندے سے بذریعہ فون رابطہ کر سکے۔