اسلام آباد ہائی کورٹ نے سابق وزیراعظم کو اشتہاری قرار دینے کا تحریری حکم نامہ جاری کر دیا ہے۔

تفصیلات کے مطابق اسلام آباد ہائی کورٹ کے جسٹس عامر فاروق اور جسٹس محسن اختر کیانی نے سابق وزیراعظم نواز شریف کو اشتہاری قرار دینے کا تین صفحات پر مشتمل تحریری حکم نامہ جاری کردیا۔

ذرائع کے مطابق نواز شریف کو العزیزیہ اسٹیل ملز اور ایون فیلڈ ریفرنسز میں مفرور اور اشتہاری قرار دیا گیا ہے۔

دونوں ریفرنسز کے الگ الگ تحریری حکم نامے جاری کیے گئے۔

 جاری حکم نامے میں کہا گیا ہے کہ نوازشریف کے ناقابل ضمانت وارنٹ گرفتاری جاری کئے گئے، پھر اشتہار کیا لیکن وہ عدالت میں پیش نہیں ہوئے، نواز شریف کیخلاف ضابطہ فوجداری کی دفعہ 87 کی کارروائی مکمل ہوگئی ہے اور انہیں مسلسل عدم حاضری پر اشتہاری مجرم قرار دیا گیا ہے

عدالتی حکم نامے میں کہا گیا کہ نوازشریف کے ضامنوں کو شوکاز نوٹس جاری کر رہے ہیں، کیونکہ نواز شریف کے ضامنوں کے خلاف مزید قانونی کارروائی نہ کی جائے۔

عدالت نے کہا کہ ضامنوں راجہ رب نواز عباسی اور سخی محمد کی ضمانتی رقم ضبط کرنے کی کارروائی کا شوکاز نوٹس جاری کردیا گیا ہے، دونوں ضامن 9 دسمبر کو ہونے والی سماعت میں عدالت کے سامنے پیش ہوں۔

واضح رہے کہ 2 دسمبر کو اسلام آباد ہائیکورٹ نے العزیزیہ اور ایون فیلڈ ریفرنسز میں  نواز شریف کو اشتہاری قرار دیا تھا اور مچلکے ضبط سمیت ضامنوں کو طلبی کے نوٹس جاری کیے تھے۔