وزیر اعظم عمران خان کا کہناہے کہ تعلیم کو فروغ دیے بغیر ملک ترقی نہیں کرسکتا۔
چکوال میں ترقیاتی منصوبوں کے سنگ بنیاد کی تقریب سے خطاب کرتے ہوئے وزیر اعظم عمران خان کا کہنا تھا کہ تعلیم کو فروغ دیے بغیر ملک ترقی نہیں کرسکتا، چکوال یونیورسٹی کے حوالے سے ہر ممکن سپورٹ کروں گا۔
عمران خان نے کہا کہ تبدیلی سب سے پہلے لوگوں کے ذہنوں میں آتی ہے۔ جو بھی اقتدار میں آتا ہے وہ اگلے الیکشن کا سوچتا ہے، ہماری حکومت آئندہ نسل کو تعلیم یافتہ بنانے کا سوچ رہی ہے۔چکوال، جہلم اور میانوالی کے لوگوں نے پاکستان کے لیے بڑی قربانیاں دی ہیں۔
ان کا کہنا تھا کہ تاریخ میں پہلی بار اپوزیشن نے فوج پر تنقید کی ہے۔ بھارت کی پروپیگنڈا مشین جیسی زبان استعمال کی جارہی ہے، بھارت میں بھی اسی طرح کی زبان استعمال کی جارہی ہے، دنیا میں پاکستان کی فوج کو بدنام کرنے کی کوشش کی جارہی ہے۔
وزیر اعظم نے کہا کہ بھارت کی پلاننگ ہے پاکستانی فوج کو کمزور کیا جائے۔ڈس انفولیب پی ڈی ایم کو بھی پروموٹ کررہی تھی، الیکشن میں دھاندلی ہوئی تو کیا سپریم کورٹ گئے یا کسی فورم پر کہا؟
عمران خان کا کہنا تھا کہ ساری قوم جانتی ہے کہ 30 سال سے ان لیڈروں نے ملک لوٹا۔نواز شریف، آصف زرداری ایک دوسرے کو چور کہتے تھے، اپوزیشن والے چوری بچانے کے لیے اب فوج پر حملہ کر رہے ہیں۔
انہوں نے مزید کہا کہ ان کا ایک ہی مطالبہ ہے کہ این آر او دے دو، یہ مجھ پر کسی طرح دباؤ ڈالنا چاہتے ہیں۔ ایک کا بیٹا، دوسرے کی بیٹی این آر او کے لیے جلسے کر رہے ہیں۔
وزیر اعظم نے کہا کہ جتنا ٹیکس کا پیسہ اکٹھا کیا آدھا قرضوں کی قسطوں میں چلا گیا۔پہلے سال میں 2 ہزار ارب کی قسطیں دیں، سود کی وجہ سے قرضے بڑھتے جارہے ہیں، کرپٹ لوگ حکومت میں آکر نظام کو بھی کرپٹ کردیتے ہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News