لاہور ہائیکورٹ میں چیئرمین پیمرا سلیم بیگ کی تعیناتی چیلنج کر دی گئی ہے۔

تفصیلات کے مطابق عدالت نے چیئرمین پیمرا کی تعیناتی کیخلاف درخواست پر پیمرا سمیت دیگر فریقین سے جواب طلب کر لیا۔

جسٹس شاہد کریم نے بول نیوز کے اینکر ظہیر الدین بابر کی درخواست پر سماعت کی۔

ذرائع کے مطابق درخواست گزارظہیر الدین بابر(بول نیوزاینکر) کا موقف ہے کہ چیئرمین پیمرا کی تعلیمی قابلیت بھی اخبار اشتہار سے مطابقت نہیں رکھتی،انھیں عہدے سے ہٹایا جائے۔

درخواستگزار کا کہنا ہے کہ سلیم بیگ کو چیئرمین پیمرا کے عہدے پر غیر قانونی طور پر تعینات کیا گیا ہے، چیئرمین پیمرا کیلئے اشتہار میں قانون اور فنانس کی ڈگری مانگی گئی تھی، جبکہ سلیم بیگ نے پولیٹیکل سائنس میں ایم اے کر رکھا ہے۔

درخواست میں موقف اپنایا گیا کہ چیئرمین پیمرا کے عہدے کیلئے اپلائی کرتے وقت سلیم بیگ بیورو کریٹ تھے،  سلیم بیگ نے نوکری میں اپلائی کرتے وقت اپنے محکمے سے این او سی بھی نہیں لیا تھا۔

درخواست گزار نے کہا کہ چیئرمین پیمرا کی تقرری کے وقت ابصار عالم کیس اور سپریم کورٹ کے فیصلے کو بھی مد نظر نہیں رکھا گیا، سلیم بیگ کی تعیناتی کرتے وقت 61 انٹرویو کئے گئے جبکہ ابصار عالم کیس میں 17 انٹرویوز کئے گئے۔

استدعا کی گئی کہ چیئرمین پیمرا سلیم بیگ کی تعیناتی ہائیکورٹ اور سپریم کورٹ کے فیصلوں سے متصادم قرار دی جائے اورچیئرمین پیمرا سلیم بیگ کو عہدے سے ہٹایا جائے۔

ذرائع کے مطابق دائر کردہ درخواست میں وفاقی حکومت، پیمرا، ڈی جی پیمرا اور چیئرمین پیمرا سلیم بیگ کو فریق بنایا گیا ہے۔

عدالت نے سلیم بیگ اور پیمرا کی طرف سے ایک وکیل کے پیش ہونے پر بھی اعتراض اٹھا دیا ۔

اس موقع پرجسٹس شاہد کریم نے ریمارکس دئیے کہ آپ یا تو سلیم بیگ کی طرف سے پیش ہوں یا پھر پیمرا کی طرف سے پیش ہوں۔

درخواستگزار ظہیر الدین بابر کی طرف سے ابوزر سلمان نیازی ایڈووکیٹ پیش ہوئے۔

سلمان خان نیازی ایڈووکیٹ نے کہا کہ اس طرح کی درخواست دائر کرنے پر پیمرا درخواست گزار کیخلاف تادیبی کارروائی کر سکتا ہے۔

جسٹس شاہد کریم نے جواب دیا کہ اگر پیمرا نے درخواستگزار کیخلاف تادیبی کارروائی کی تو درخواستگزار عدالت سے رجوع کر سکتا ہے۔