پاک سر زمین پارٹی کے سربراہ مصطفیٰ کمال نے کہا ہے کہ  وزیر اعظم عوام کو انقلاب کے سنہرے خواب دکھا رہے ہیں۔

تفصیلات کے مطابق پاک سر زمین پارٹی (پی ایس پی ) کے چیئرمین مصطفیٰ کمال نے احتساب عدالت میں پلاٹوں کی غیرقانونی الاٹمنٹ کے ریفرنس میں پیشی کے موقع پر میڈیا سے بات کرتے ہوئے  کہا کہ ملک مشکلات میں گھرا ہوا ہے اور بلدیاتی نظام سے ہی صوبوں میں ترقی آتی ہے۔

انہوں نے کہا کہ وزیر اعظم عوام کو انقلاب کے سنہرے خواب دکھا رہے ہیں لیکن عوام کو انقلاب کے سنہرے خواب کو تعبیر کون دے گا ؟ صوبوں کی مسائل بیورو کریسی کے ذریعے حل کرائے جا رہے ہیں۔

ان کا کہنا ہے کہ ملک میں جمہوری مارشل لاءہے، اٹھارویں ترمیم کے ذریعے وزیراعلیٰ ڈکٹیٹر بن گئے ہیں، اختیارات نچلی سطح تک منتقل نہیں کر رہے ہیں۔

مصطفیٰ کمال نے کہا کہ وزیر اعظم عمران خان صوبوں میں بلدیاتی انتخابات کا اعلان کریں کیونکہ صوبوں کو درپیش مسائل کا کوئی پرسان حال نہیں، یہاں پر لوکل گورنمنٹ کے حوالے سے جمہوری آمریت ہے اور مقامی حکومتوں کے نظام پر شب وخون مارا گیا ہے۔

پی ایس پی چیئرمین کا کہنا تھا کہ وزیراعظم عمران خان آپ کی حکومت پنجاب ،کے پی اور بلوچستان میں ہے،وہاں ہی مقامی حکومتوں کا الیکشن کرا دیں۔

انہوں نے کہا کہ وزیر اعلیٰ سندھ کہتے ہیں حلقہ بندیاں نہیں ہو سکتیں، اٹھارویں ترمیم کے ذریعے وزیراعلیٰ ڈکٹیٹر بن گئے ہیں انہیں مجبور کیا جائے کہ اختیارات آگے تک منتقل کریں۔

سربراہ پاک سرزمین پارٹی نے کہا کہ اٹھارویں ترمیم کے تحت اختیارات نچلی سطح تک منتقل نہیں کیے گئے جبکہ وفاق سے ملنے والی رقم وزیراعلیٰ لے کر بیٹھ جاتے ہیں، ایف سی ایوارڈ وسائل کی منتقلی کا طریقہ ہے اور اختیارات وزیراعلیٰ ہاؤس میں آکر رک گئے ہیں۔