پی ڈی ایم کے لاہورجلسے میں شرکت کے لیے مختلف شہروں سے قافلوں کی آمد کا سلسلہ جاری ہے۔

تفصیلات کے مطابق حکومت مخالف اتحاد پاکستان ڈیمو کریٹک موومنٹ (پی ڈی ایم) کے جلسے کے سلسلے میں سیاسی رہنماؤں اور  مختلف شہروں سے قافلوں کی آمد کا سلسلہ جاری وساری ہے۔

ذرائع کے مطابق  پی ڈی ایم قیادت بھی سابق اسپیکر قومی اسمبلی سردار ایاز صادق کے گھر ظہرانے کے بعد جلسہ گاہ پہنچے گی۔

مینار پاکستان گراؤنڈ میں کرسیاں لگا دی گئی ہیں اور  سیاسی کارکنوں کا خون گرمانے کے لیے ساؤنڈ سسٹم بھی پہنچا دیے گئے ہیں جبکہ قائدین کے لیے 5 کنٹینرز  پر مشتمل اسٹیج تیار کیا گیا ہے۔

جلسے کی سیکیورٹی کے فرائض جمعیت علمائے اسلام کے کارکنوں کے سپرد کیے گئے ہیں۔

 اپنے تازہ بیان میں معاون خصوصی وزیراعلی پنجاب فردوس عاشق اعوان نے کہا کہ یہ مینار پاکستان کو بھرنے نکلے تھے، لیکن عوام نے اپوزیشن کو مسترد کردیا، آج انہوں نے خود کو مینارپاکستان میں کارنر کرلیا ہے، آج 70فیصد مینارپاکستان خالی صرف30فیصد پر سیاسی تھیٹر ہے، لوگ نہیں آرہے۔

وزیر داخلہ شیخ رشید نے پاکستان ڈیموکریٹک مومنٹ (پی ڈی ایم) کے جلسے سے متعلق گفتگو کرتے ہوئے کہا کہ لیڈر پیغام دیتا ہے گلی گلی دعوت نامے نہیں دیتا، آج جلسے کے بعد ان کی شکست کا وقت شروع ہو جائے گا۔

ان کا کہنا تھا کہ یہ عمران خان کا کچھ نہیں بگاڑ سکتے ، یہ اپنی سیاست کو خود ختم کرنے جا رہے ہیں۔

شیخ رشید نے مزید کہا کہ یہ جلسہ تاریخی ہوگا یا نہیں اس کا فیصلہ چند گھنٹوں میں ہوجائیگا، یہ خود اپنی سیاست کو بند گلی میں لے کر جا رہے ہیں۔

واضح رہے کہ جلسے میں شرکت کے لیے چیئرمین پاکستان پیپلز پارٹی بلاول بھٹو زرداری، مسلم لیگ ن کی نائب صدر مریم نواز شریف ،اور دیگررہنما پی ڈی ایم کے سربراہ مولانا فضل الرحمٰن کی قیادت میں سردار ایاز صادق کے گھر جمع ہو گئے۔

مریم نواز، بلاول بھٹو زرداری اور مولانا فضل الرحمٰن ریلیوں کی شکل میں ایاز صادق کے گھر پہنچے ہیں۔

پی ڈی ایم کے قائدین ایک میز پر موجود ہیں ،جہاں وہ مریم نواز کی جانب سے دیئے گئے ظہرانے میں شریک ہیں۔