وفاقی وزیر برائے انسانی حقوق شیریں مزاری  کا کہنا ہے کہ  بھارت کی جانب سے کشمیریوں پر ظلم و ستم جاری ہے۔

اسلام آباد میں  پریس کانفرنس کرتے ہوئے وفاقی وزیر برائے انسانی حقوق شیریں مزاری   کا کہنا ہے کہ بھارت کی جانب سے کشمیریوں پر ظلم و ستم تو جاری ہے، اب ایک بہت خوفناک اقدام اٹھایا جانے  والاہے۔

شیریں مزاری  نے کہا کہ 2012 میں بھارتی سپریم کورٹ کے مطابق عمر قید کے قیدی کو مرنے تک جیل میں رہنا ہے۔ آسیہ اندرابی کے حوالے سے 14 جنوری یا 18 جنوری کو فیصلہ آنا ہے۔

انہوں نے کہا کہ آسیہ اندرابی اور ان کے شوہر جیل میں ہیں۔ آسیہ اندرابی کو تہاڑ جیل میں رکھا گیا ہے دو اور خواتین ان کے ساتھ ہیں۔ آسیہ اندرابی اور دونوں خواتین کو عمر قید کی سزا سنائی جا سکتی ہے۔

وفاقی وزیر برائے انسانی حقوق نے کہا کہ  عالمی انسانی حقوق کی تنظیمیں خاموش کیوں ہیں، یہ ظلم اور تشدد ہے  لیکن اقوام متحدہ  خاموش ہے۔ ہماری حکومت کو اس معاملے کو اٹھانا چاہیے۔ ہمیں فون اور خطوط سے آگے بڑھنا ہوگا، بیرون ملک مشنز کشمیر کمیٹی کو فعال کردار ادا کرنا ہوگا۔

شیریں مزاری نے کہا کہ  عالمی امن کی تنظیمیں خواتین پر ظلم و تشدد پر خاموش کیوں ہے۔ جینوا کنونشن کے تحت آزادی کی تحریک کا حصہ بننے والوں کو مقبوضہ علاقے سے نہیں لے جا سکتے۔ ایمنسٹی انٹرنیشنل اور دیگر عالمی انصاف کی تنظیمیں نوٹس لیں۔