چئیرمین نیب جسٹس ریٹائرڈ جاوید اقبال نے کہا ہے کہ ہم شفاف احتساب کی پالیسی پر عمل پیرا ہیں کیونکہ ملک کو لوٹنے والوں کا احتساب کرنا ادارے کا نصب العین ہے۔

تفصیلات کے مطابق اسلام آباد میں تاجروں سے خطاب میں چئیرمین نیب نے کہا ہے کہ اصلی کاروباری افراد اور ڈکیت میں فرق ہوتاہے، اصل بزنس مین کی طرف نیب آنکھ اٹھاکربھی نہیں دیکھتا۔

چیئرمین نیب جاوید اقبال نے مزید کہا ہے کہ ثابت ہو جائے ایک تاجر نے بھی نیب کے خوف سے ملک چھوڑا تو گھر چلا جاؤں گا۔

انہوں نے کہا ہے کہ جو کہتے ہیں دھیلے کی کرپشن نہیں کی ان کے خلاف اربوں کی کرپشن ثابت ہوگی ایک صوبے سے جواب آیا کہ گندم چوہے کھا گئے اور جب چند موٹے چوہے پکڑے تو دس سے پندرہ ارب روپےکی رقم واپس آگئی۔

چیئرمین نیب نے کہا کہ پانچ سو کی جگہ پانچ لاکھ خرچ کرنے کا پوچھا تو کیا غلط کیا، کسی نے منی لانڈرنگ کی تو ضرور پوچھا جائے گا۔

چیئرمین نیب نے نیب حراست میں اموات کی تردید کرتے ہوئے کہا ہے کہ صرف یہ نہیں کہا گیا کہ کورونا نیب نے پھیلایا باقی ہر الزام لگادیا گیا ہے۔