پاکستان مسلم لیگ ن کے سیکرٹری جنرل احسن اقبال نے کہا ہے کہ اپوزیشن الیکشن کمیشن کے باہر پرامن احتجاج کرے گی تاہم اپوزیشن احتجاج کا مقصد توڑ پھوڑ کرنا نہیں ہے۔

تفصیلات کے مطابق مسلم لیگ ن کے سیکرٹری جنرل احسن اقبال نے الیکشن کمیشن کے باہر میڈیا سے گفتگو کرتے ہوئے کہا ہے کہ پی ٹی آئی کی چوری پکڑی جاچکی ہے اور اب اعتراف جرم اور شواہد سامنے آنے پرالیکشن کمیشن کو دوہزاراٹھارہ کے انتخابات کالعدم قراردینے چاہئیے۔

انہوں نے کہا ہے کہ پاکستان کے انتخابی قوانین میں سیاسی جماعت کو بیرون ملک شہریوں یا اداروں یا فنڈنگ لینے پر پابندی ہے لیکن تحریک انصاف نے بیرون ملک مقیم پاکستانیوں سے کروڑوں کا فنڈ حاصل کئے۔

اس حوالے سے انہوں نے مزید کہا کہتحریک انصاف نے سکروٹنی کمیٹی میں غیر ملکی فنڈنگ تسلیم کی لیکن اس کی ذمہ داری ایجنٹس پر ڈال دی گئی اور تحریک انصاف نے پیسہ استعمال کیا تو اس کا جواب بھی دینا ہوگا۔

احسن اقبال کا کہنا تھا کہ 2018 کے انتخابات کی قانونی حیثیت پر سوالیہ نشان پڑ گیا ہے اور ہمیں امید ہے الیکشن کمیشن تحریک انصاف کی رجسٹریشن منسوخ کر کے عمران خان کو نا اہل قرار دے گا۔