کالعدم تحریک لبیک پاکستان (ٹی ایل پی) اور حکومتی کمیٹی کے مذاکرات کے دو دور ہوئے جس میں ڈیڈ لاک برقرار ہے۔

تفصیلات کے مطابق کالعدم تحریک لبیک پاکستان (ٹی ایل پی) اور حکومتی مذاکراتی ٹیم کے درمیان مذاکرات کا تیسرا دور جاری ہے جس میں وفاقی وزیر داخلہ شیخ رشید ، گورنر پنجاب چوہدری سرور ، وزیر قانون راجہ بشارت ، وفاقی وزیر مذہبی امور نور الحق قادری نے شرکت کی۔

ذرائع کے مطابق مذاکرات کے دوران کالعدم تحریک لبیک نے فرانسیسی سفیر کی ملک بدری اور شیخ رشید کے استعفی کا مطالبہ پھر سے کر دیا ہے جس پر حکومتی ٹیم نے فرانسیسی سفیر کی ملک بدری اور شیخ رشید کو عہدے سے ہٹانے سے انکار کردیا ہے۔

ذرائع کا کہنا ہے کہ مذاکرات کاروں نے سعد رضوی اور کارکنان کی رہائی کا تاحال مطالبہ نہیں کیا، ٹی ایل پی رہنماؤں کا کہنا ہے کہ حکومت اپنے معاہدے پر عمل کرے۔

ذرائع کا  یہ بھی کہنا ہے کہ کالعدم ٹی ایل پی معاہدے کی پاسداری اور سفیر کو نکالنے کے مطالبے پر قائم ہے، رہنماؤں کا کہنا ہے کہ معاہدے پر عمل نہ ہوا تو لائحہ عمل طے کریں گے۔

ذرائع کا مزید کہا ہے کہ حکومت سے مذاکرات میں پیش رفت نہ ہوئی تو ٹی ایل پی کل مارچ کا اعلان کرسکتی ہے، ممکنہ مارچ کی صورت میں حکومت نے اقدامات شروع کردیے۔