وزیراعظم عمران خان کے معاون خصوصی برائے مذہبی امور مولانا علامہ طاہر اشرفی کا کہنا ہے کہ فلسطین عربوں کا نہیں عالم اسلام کا مسئلہ ہے۔
میڈیا سے گفتگو کرتے ہوئے معاون خصوصی برائے مذہبی امور مولانا علامہ طاہر اشرفی کا کہنا تھا کہ فلسطین عربوں کا نہیں عالم اسلام کا مسئلہ ہے، مسئلہ فلسطین کے حل کیلئے پالیسی بنانی ہوگی، اسرائیل کا غصہ اپنے ملک پر نکال کر اپنی املاک کو تباہ نہیں کرسکتے، نوجوان فلسطینوں کی آواز بلند کرنے کیلئے سوشل میڈیا کو استعمال کریں، فلسطینوں کو ہماری مالی سے زیادہ اخلاقی مدد کی ضرورت ہے، ہمیں فلسطینوں کی آواز دنیا کے ہر فورم پر بلند کرنی ہے۔
انہوں نے کہا کہ بچوں کی دنیا کے ساتھ ساتھ دینی تربیت کرنا بھی نہایت ضروری ہے، آج پورے ملک میں فلسطینیوں کے ساتھ اظہار یک جہتی کیا جا رہا ہے، آج علماء مشائخ کونسل کی آواز پر یوم فلسطین منایا جارہا ہے، اسلامی تعان تنظیم کا اجلاس طلب کیا تھا جو اب بلا لیا گیا ہے، وزیراعظم عمران خان نے ملاقات میں اسلامی تنظیم سے اپیل کی تھی، پاکستان اسلامی تنظیم سے ہر طرح کا تعاون کرنے کے لیے تیار ہے، پاکستان چاہتا ہے کہ فلسطین کا مسئلہ حل ہو۔
علامہ طاہر اشرفی کا کہنا تھا کہ وزیر اعظم نے سعودی فرمانروا اور فلسطین کے سفیر سے بھی بات کی ہے، پاکستان کا پورے عالم اسلام کو پیغام ہے کہ اب متحد ہوکرآگے بڑھیں، اقوام متحدہ کتے کی خراش آنے پر بولتا ہے لیکن انسانی شہادتوں پر خاموش ہے، امید کرتے ہیں اسلامی تعاون تنظیم کا جو اجلاس بلایا گیا اس میں مثبت نتائج سامنے آئیں گے۔ مسلم امہ کشمیر اور فلسطین کے مسئلہ پر اب آگے بڑھے گی، آج پوری قوم نے اپنے فلسطینیوں کو پیغام دیا ہے کہ ہمارا دل و روح آپ کے ساتھ ہے، جیسے حرمین شریفین جان سے زیادہ عزیز ہے ویسے ہی مسجد اقصیٰ ہے، علماء نے فیصلہ کیا ہے تمام سیاسی جماعتوں کو جمع کریں گے، تمام لوگوں کو فلسطینوں کے مسئلہ پر جمع کرکے عملی اقدامات اٹھائیں گے، قریب ہے وہ دن جب سب جائیں گے اقصیٰ میں دو نفل ادا کریں گے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News