صدر مملکت ڈاکٹر عارف علوی نے کہا ہے کہ عالمی برادری افغانستان کے عوام کو معاشی اور انسانی امداد جاری رکھے۔
تفصیلات کے مطابق صدر مملکت ڈاکٹر عارف علوی سے اقوام متحدہ کے ہائی کمشنر برائے پناہ گزین فلپو گرانڈی کی ملاقات ہوئی جس میں صدر مملکت نے فلپپو گرانڈی کو افغانستان کو پاکستان کی جانب سے دی گئی حالیہ انسانی امداد اور طبی سامان کے بارے میں آگاہ کیا۔
ملاقات میں صدر مملکت ڈاکٹر عارف علوی نے افغانستان سے بین الاقوامی تنظیموں ، سفارتی مشنز کے اراکین کے انخلا میں پاکستان کی کوششوں پر بھی روشنی ڈالی۔
ڈاکٹر عارف علوی نے کہا کہ طویل جنگ نے افغان عوام کی مشکلات میں اضافہ کیا،عالمی برادری تنہا نہ چھوڑے۔ عالمی برادری افغانستان کے عوام کو معاشی اور انسانی امداد جاری رکھے۔
صدر مملکت نے کہا کہ پاکستان نے افغانستان میں امن کے فروغ اور تعمیر نو میں اہم کردار ادا کیا ہے۔
ڈاکٹر عارف علوی کا کہنا تھا کہ پاکستان دنیا کا واحد ملک ہے جس نے گزشتہ چار دہائیوں سے 35 لاکھ سے زائد افغان مہاجرین کی میزبانی کی جبکہ پاکستان نے افغان مہاجرین کو صحت اور تعلیم کی بھی سہولیات فراہم کی۔
صدر مملکت ڈاکٹر عارف علوی نے مزید کہا کہ دنیا افغانستان میں امن کے فروغ ، 40 سالوں سے لاکھوں افغان مہاجرین کی میزبانی میں پاکستان کے کردار کو تسلیم کرے۔
ملاقات میں ہائی کمشنر برائے پناہ گزین فلپو گرانڈی نے لاکھوں افغان مہاجرین کی میزبانی اور افغانستان میں انسانی امداد بھیجنے پر پاکستان کے کردار کو سراہا۔
دوسری جانب صدر مملکت عارف علوی سے سیالکوٹ چیمبر آف کامرس اینڈ انڈسٹری کے وفد نے ملاقات کی جس میں وفد نے صدر مملکت کو سیالکوٹ چیمبر کی برآمدی صلاحیت ، ملکی سماجی و اقتصادی ترقی میں کردار کے بارے میں بریفنگ دی ، قیصر اقبال بریار نے صدر مملکت کو سیالکوٹ کی تاجر برادری کو درپیش بعض مسائل سے آگاہ کیا۔
اس موقع پر صدر مملکت عارف علوی نے ایس سی سی آئی کو درپیش مسائل کے حل میں مدد کی یقین دہانی کروائی۔
عارف علوی نے کہا کہ تاجر ، صنعتکار ، خواتین اور خصوصی افراد کو بااختیار بنانے کیلئے اپنے اداروں میں روزگار دیں ، خصوصی افراد ملک کی آبادی کا 12 سے 14 فیصد حصہ ہیں۔
انہوں نے کہا کہ خصوصی افراد کو کاروباری برادری کے تعاون سے ہنر مند بنا کر ملازمتوں کی فراہمی اور مالی طور پر مستحکم کرنے کی ضرورت ہے ، حکومت نوجوانوں ، خواتین اور خصوصی افراد کو بااختیار بنائے۔
صدر مملکت عارف علوی نے مزید کہا کہ حکومت نے اپنے کاروبار کیلئے کامیاب نوجوان پروگرام کے تحت 100 ارب روپے مختص کیے ، نوجوانوں ، خواتین اور خصوصی افرادکو قرضوں کے حصول میں سہولت اور رہنمائی فراہم کرنے کی ضرورت ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News