ٹی ٹوئنٹی ورلڈ کپ 2021، بھارت کے میچ میں قومی ٹی ٹوئنٹی اسکواڈ کا اعلان

اریبہ تنویر

23rd Oct, 2021. 11:26 pm

بھارت کے خلاف میچ میں قومی ٹی ٹوئنٹی اسکواڈ کا اعلان ہو گیا ہے۔
تفصیلات کے مطابق انٹرنیشنل کرکٹ کونسل (آئی سی سی) مینز ٹی ٹوئنٹی ورلڈ کپ میں قومی ٹیم کے کپتان بابر اعظم نے بھارت کے خلاف ٹیم کا اعلان کر دیا ہے۔
کھلاڑیوں میں کپتان بابر اعظم، محمد رضوان، فخر زمان، شعیب ملک، محمد حفیظ، حارث رؤف، شاہین شاہ، حسن علی، آصف علی، عماد وسیم، شاداب خان اور حیدر علی شامل ہیں۔
یاد رہے کہ پاکستان اور بھارت کے درمیان ٹی ٹوئنٹی میچ کل اتوار کو کھیلا جائے گا۔
سابق کپتان محمد یوسف نے اپنے بیان میں کہا کہ پاکستان ٹیم کا ٹی ٹوئنٹی کرکٹ کے لیے زبردست کمبینیشن بنا ہوا ہے، امید ہے کہ ٹیم اچھا پرفارم کرے گی۔
قوقی کرکٹ ٹیم کے سابق کپتان نے کہا کہ پوری قوم کی طرح میں بھی بہت پر امید ہوں کہ پورے ورلڈ کپ میں قومی ٹیم اچھا پرفارم کرے گی۔
محمد یوسف کا کہنا تھا کہ ہماری ٹیم میں ایسے کھلاڑی ہیں جو اکیلے میچ جتوا سکتے ہیں۔
ان کا کہنا تھا کہ کرکٹ میں یہ کہنا بہت مشکل ہوتا ہے کہ کون سی ٹیم کہاں تک آگے جائے گی لیکن میں یہ ضرور کہہ سکتا ہوں کہ پاکستان ٹیم میں اتنا پوٹینشل ہے کہ فائنل تک رسائی حاصل کرے گی۔ فائنل میں ہار جیت کھیل کا حصہ ہوتا ہے لیکن ہمیں قومی ٹیم سے امید ہے کہ فائنل بھی جیتے گی۔
محمد یوسف نے کہا کہ پاکستان کے دونوں اوپنرز پچھلے ایک عرصے سے بہت اچھا پرفارم کر رہے ہیں جبکہ مڈل آرڈر اچھا ہے جس میں سینئر اور جونیئر کا اچھا کمبینیشن بنا ہے۔
انہوں نے کہا کہ عماد وسیم اور شاداب خان دونوں اچھے اسپنرز ہیں جبکہ شاہین شاہ آفریدی، حسن علی اور حارث رئوف فاسٹ بولنگ کے شعبے میں شاندار ہیں۔
محمد یوسف کا کہنا تھا کہ میں حسن علی کا بہت بڑا فین ہوں، حسن علی سے ہمیشہ امیدیں لگا کر رکھتا ہوں کیونکہ وہ بہت خطرناک کھلاڑی ہیں۔
محمد یوسف کا حسن علی کے حوالے سے یہ بھی کہنا ہے کہ وہ بیٹنگ، بولنگ اور فیلڈنگ میں بہت شاندار ہیں، حسن علی کلین ہٹنگ کرتے ہیں، وہ ایسے پلیئر ہیں جو ٹیم کو اٹھا کر رکھتے ہیں۔
بھارت کے خلاف اعلان کردہ 12 رکنی اسکواڈ کا دبئی میں ٹریننگ سیشن جاری ہے اور قومی اسکواڈ میگا ایونٹ میں پہلے میچ سے قبل آخری ٹریننگ سیشن حاصل کرنے میں مصروف ہے۔
فیلڈنگ سیشن کے بعد باؤلرز نیٹ میں ٹارگٹ باؤلنگ کرنے میں مصروف ہیں۔

Square Adsence 300X250