امتیاز شیخ کا کہنا ہے کہ پیٹرول ڈیلر ایسوسی ایشن سے گزارش ہے فی الحال ہڑتال کو مؤخر کردیا جائے۔

وزیر توانائی سندھ امتیاز شیخ نے پیٹرول پمپ کی ہڑتال پر ردعمل دیتے ہوئے کہا کہ گیس کی بندش کی وجہ سے عوام پہلے ہی شدید مشکلات کا شکار ہیں۔

انہوں نے کہا کہ پیٹرولیم ڈیلر ایسوسی ایشن کی ہڑتال اوگر اور پیٹرولیم ڈویژن کی ناکامیوں کامنہ بولتا ثبوت ہے۔

امتیاز شیخ نے مزید کہا کہ حکمرانوں کی نااہلی اور ہٹ دھرمیوں کی سزا عوام کو نہ دی جائے۔

واضح رہے کہ ملک بھر میں آج پیٹرولیم ڈیلرز ایسوسی ایشن کی جانب سے ہڑتال کی جارہی ہے جس کے باعث ملک کے تمام بڑے شہروں میں پیٹرول پمپس بند ہونے کے باعث عوام کو شدید مشکلات کا سامنا کرنا پڑ رہا ہے۔

پاکستان اسٹیٹ آئل اور شیل کی جانب سے پیٹرولیم ڈیلرز ایسوسی ایشن کی ہڑتال سے لاتعلقی کا اعلان کرتے ہوئے اپنے تمام پیٹرول پمپس کھلے رکھنے کا اعلان کیا گیا تھا۔

 ملک کے مختلف شہروں میں جہاں جہاں پی ایس او اور شیل کے پیٹرول پمپس کھلے ہیں وہاں پیٹرول کے حصول کے لیے عوام کی لمبی قطاریں لگی ہوئی ہیں تاہم پی ایس او اور شیل نے عوام کی آسانی کے لیے اپنے کھلے پیٹرول پمپس کی فہرست جاری کردی۔