گورنر بلوچستان سید ظہور احمد آغا نے کہا کہ بدعنوانی ختم کرنا صرف نیب کا کام نہیں ہے۔

انہوں نے عالمی دن انسداد بدعنوانی کی تقریب سے خطاب کرتے ہوئے کہا کہ لفظ “بدعنوانی” بہت بڑا چیپٹر ہے اور ہم بد قسمتی سے اس دلدل میں گھیرے ہوئے ہیں۔

ظہور آغا نے کہا کہ میڈیا کے توسط سے غریب عوام اپنی آواز صاحب اقتدار تک پہنچاتا ہے، بدعنوانی کا مقصد لوگوں حق تلفی کرنا ہے۔

انہوں نے کہا کہ اللہ کے احکامات کو نظر انداز کر کے کرپشن جیسا  گھناونا کام کیا جاتا ہے اور اللّٰہ کی ناراضگی کے ساتھ حقوق اللّٰہ کی بھی تلفی ہوتی ہے، اللّٰہ فرماتا ہے حقوق اللّٰہ میں کوتاہی کی معافی میں نہیں دے سکتا۔

گورنر بلوچستان کا کہنا ہے کہ ترقی یافتہ ممالک بھی ان مسائل سے لڑ کر ہی آگے بڑھ رہے ہیں، بدعنوانی ختم کرنا صرف نیب کا کام نہیں، اس میں ہر شہری کا کردار ضروری ہے، نیب کارروائی کرتی ہے، اربوں روپے خزانے میں جمع کرواتی ہے۔

ظہور آغا نے کہا کہ مال بٹورنے کے لیے بد عنوان افراد مل کر حکمت عملی بناتے ہیں، غلط کام کرنے سے پہلے ضمیر نہیں مانتا، آپ لوگ اپنے ضمیر کے مطابق کام کریں۔

انہوں نے مزید کہا کہ انسان کو چاہیے اپنے اندر اصطلاحات لائے، ہر ادارے میں اصلاحات کی ضرورت ہے، ہر فرد کی معاشرے میں انفرادی حیثیت ہے، اگر انفرادی طور پر طے کر لے غلط کام نہیں کریں گئے تو معاشرہ بہتر ہوگا اور ہمارے معاشرے میں اچھے لوگ بھی موجود ہیں جن کو سراہانے کی ضرورت ہے۔