وزیر اعلیٰ خیبرپختونخوا محمود خان نے کہا ہے کہ ملک سے بدعنوانی کا خاتمہ موجودہ حکومت کی سب سے اہم ترجیح ہے۔

انہوں نے انسداد بدعنوانی کے عالمی دن کے موقع پر پیغام دیتے ہوئے کہا کہ عالمی سطح پر اس دن کو منانے کا مقصد بدعنوانی کے خلاف آگہی پیدا کرنا ہے۔

محمود خان نے کہا کہ بدعنوانی ایک معاشرتی برائی ہے جو قومی ترقی و خوشحالی کی راہ میں بڑی رکاوٹ ہے، اس کا تدارک سب کی اجتماعی ذمہ داری ہے جس کے لئے مربوط کوششوں کی ضرورت ہے۔

یہ بھی پڑھیں؛ کرپشن کرنا عوام کے حقوق پر ڈاکہ ڈالنے کے مترادف ہے، وزیر اعلیٰ پنجاب

وزیر اعلیٰ خیبرپختونخوا کا کہنا ہے کہ ملک سے بدعنوانی کا خاتمہ موجودہ حکومت کی سب سے اہم ترجیح ہے، پاکستان تحریک انصاف کا بیانیہ ہی بدعنوانی کے خاتمے اور بے لاگ احتساب پر مبنی ہے۔

محمود خان نے کہا کہ بلاتفریق احتساب کے بغیر کوئی بھی قوم ترقی نہیں کر سکتی، موجودہ حکومت ہر طرح اور ہر سطح کی بدعنوانی کے تدارک کے لئے بھر پور اقدامات اٹھا رہی ہے۔

انہوں نے مزید کہا کہ بدعنوانی کے خاتمے کے لئے میرٹ کی بالادستی،  قانون کی عملداری، شفافیت اور گڈ گورننس بنیادی اہمیت کے حامل ہیں، ملک کو بدعنوانی کے ناسور پاک کرنے کے لئے انفرادی اور اجتماعی سطح پر کوششوں کی اشد ضرورت ہے، ملک میں بدعنوانی کے خاتمے کے لئے متعلقہ اداروں کی کاوشیں قابل تعریف ہیں۔