حلیم عادل شیخ نے کہا ہے کہ پیپلزپارٹی کی گراؤنڈ پر مقبولیت ختم ہوچکی ہے۔

اپوزیشن لیڈر سندھ اسمبلی حلیم عادل شیخ نے میڈیا سے گفتگو کرتے ہوئے کہا ہے کہ پیپلزپارٹی کی گراؤنڈ پر مقبولیت ختم ہوچکی ہے اسی لیے وہ الٹی چھلانگیں لگارہے ہیں ، اپنی حکومت کو بچانے کے لیے فیڈریشن کو کمزور کررہے ہیں۔

انہوں نے کہا کہ  پہلے ہر معاملے پر کہتے تھے وفاق نے حملا کردیا، روٹیشن پالیسی کا چاروں صوبوں پر اطلاق ہوا، مراد علی شاہ نے اسے سندھ پر حملہ قرار دیا، سندھ حکومت نے زبردستی افسران کو روکنا چاہا، اب ایک نیا پولیس کیڈر متعارف کرانا چاہ رہے ہیں، میری اطلاع کے مطابق آج کابینہ اجلاس میں اس پر گفتگو ہوگی۔

اپوزیشن لیڈر سندھ اسمبلی نے کہا کہ وزیر اعلیٰ کو میں نے خط لکھا ہے، پولیس کیڈر آئین کے خلاف ہے، ان کا دماغ مکمل طور خراب ہوچکا ہے، سندھ حکومت عجیب حرکت کرنے جارہی ہے، ڈی آئی جی پنجل خان ہیڈ کانسٹیبل ہوتا تھا ، ڈی آئی جی پنجل خان سے راؤ انوار تک قصے موجود ہیں۔

 حلیم عادل شیخ نے کہا کہ پنجل خان نے سیاسی مخالفین کو بند کرکے ظلم کیے تھے، بہادر بیٹے راؤ انوار نے 400 سے زائد جعلی مقابلے کیے، سرداروں زرداروں جیالوں کی اولادوں کو ڈائریکٹ عہدوں پر بھرتی کیا گیا، کوئی غریب آدمی کا بیٹا افسر نہیں لگا، سندھ کے افسران کے خلاف ڈسپلنری ایکشن چل رہا ہے ، ان افسران کو مسلط کرنے کے لیے یہ پولیس کیڈ میں تبدیلی کرنے جارہے ہیں۔

انہوں نے کہا کہ سرور راہپوٹو سکندر راہوپوٹو کا بھائی ہے، اس کی گاڑی سے رینجرز نے چرس ریکور کی، اس کا نام آج کیس سے نکال دیا گیا، وہ وزیراعلیٰ ہاؤس میں روپوش تھے، سندھ حکومت ایسی فورس بنانا چاہتی ہے جو چرس سپلائی کرے، ارسلان محسود، نقیب اللہ، انتظار  اطہر سولنگی، محب سولنگی، ریاض کلہوڑو، سجاد سومرو، پولیس گردی کا نشانہ بن چکے ہیں۔

اپوزیشن لیڈر سندھ اسمبلی حلیم عادل شیخ نے کہا ہے کہ سندھ پبلک سروس کمیشن کے ذریعے یہ ڈی ایس پی بھرنا چاہتے ہیں، سندھ میں باجاری اور زرداری فورس بنائی جارہی ہے، سندھ پبلک سروس کمیشن کے ذریعے وڈیروں کے بیٹے افسر بنیں گے، سندھ پولیس کو زرداری فورس بنادیں گے، پی ایس پی افسران کہاں جائیں گے، فیڈرل سروس سے سندھ کے لوگوں کو نکالا جارہا ہے۔