وفاقی وزیر مملکت برائے اطلاعات و نشریات فرخ حبیب نے کہا ہے کہ اگر نوجوان کامیاب ہوگا تو پاکستان کامیاب ہوگا۔

تفصیلات کے مطابق وزیر مملکت فرخ حبیب نے کامیاب جوان اسپورٹس ڈرائیو کی تقریب سے خطاب کرتے ہوئے کہا کہ پاکستان کو مثبت سرگرمیوں کے ساتھ پروان چڑھانا ہے۔

فرخ حبیب نے کہا کہ کامیاب جوان اسپورٹس ڈرائیو سے ہی اولمپین اور چیمپینز نکلیں گے۔

وفاقی وزیر مملکت کا کہنا تھا کہ کامیاب جوان اسپورٹس ڈرائیو سے نوجوانوں میں کھیلوں کے میدان میں جوش و جذبہ پیدا ہورہا ہے۔

 فرخ حبیب نے کہا کہ کھیلوں سے لگاؤ رکھنے والے نوجوانوں کو کامیاب جوان اسپورٹس ڈرائیو کے زریعے مشغول کیا ہے۔

انہوں نے کہا کہ پاکستان کے نوجوانوں کو کھیلوں کی طرف راغب کرنا ہی ہمارا ہدف ہے۔

فرخ حبیب نے کہا کہ میرا پسندیدہ کھیل کرکٹ ہے۔

انہوں نے کہا کہ نیشنل اسپورٹس پالیسی کے زریعے تمام صوبوں کو کھیلوں کے حوالے سے ساتھ ملایا ہے، کرکٹ کے ساتھ ساتھ مختلف کھیلوں کو بھی پاکستان میں فروغ دینا ہے۔

فرخ حبیب نے مزید کہا کہ وزیراعظم کے نظریے کے مطابق پاکستان میں کھیلوں کے میدان آباد کرنے ہیں۔

دوسری جانب عثمان ڈارکا کہنا تھا کہ پچھلے بہتر سالوں میں نوجوانوں اور کھیلوں کو بری طرح نظرانداز کیا گیا۔