وزیراعلیٰ پنجاب سردار عثمان بزدار کی جانب سے فیصل آباد میں پاکستان کے سب سے بڑے ایکسپو سینٹر بنانے کی اصولی منظوری دے دی گئی ہے۔

تفصیلات کے مطابق وزیراعلیٰ پنجاب سردارعثمان بزدار کی زیرصدارت اجلاس ہوا ہے، اجلاس میں پنجاب میں اسپیشل اکنامک زونز پر پیش رفت کا جائزہ لیا گیا ہے۔

وزیراعلیٰ پنجاب سردار عثمان بزدار نے کہا کہ سیالکوٹ میں بھی ایکسپو سینٹربنایا جائے گا، ایکسپورٹ بڑھانے کیلئے سیالکوٹ میں سرجیکل سٹی بنایا جائے گا۔

عثمان بزدار نے کہا کہ چونیاں میں ایکوا پارک پراجیکٹ کا بھی جلدآغاز کردیا جائے گا جبکہ وزیراعلیٰ سرمایہ کاری سہولت سینٹرسرمایہ کاروں کے مسائل کے حل کیلئے کلیدی کردارادا کررہے ہیں۔

عثمان بزدار کا کہنا تھا کہ چونیاں، بہاولپور، مظفرگڑھ میں اکنامک زونزپر کام تیزی سے جاری ہے جبکہ اسپیشل اکنامک زونز وہاڑی، گجرات، قائداعظم بزنس پارک شیخوپورہ میں یوٹیلیٹیز کی فراہمی کیلئے فنڈز جاری ہوچکے ہیں۔

انہوں نے مزید کہا کہ چین، ترکی، جاپان، کوریا اوردیگر ممالک کے سرمایہ کاروں کی اسپیشل اکنامک زونز میں سرمایہ کاری کیلئے دلچسپی کا خیر مقدم کرتے ہیں۔

واضح رہے کہ اجلاس میں صوبائی وزیر صنعت میاں اسلم اقبال، چیف سیکرٹری، سیکرٹری انڈسٹریز، چیئرمین پیڈمک، چیئرمین فیڈمک، اسپیشل مانیٹرنگ یونٹ کے سربراہ اوردیگرحکام نے شرکت کی۔