قائد منہاج القرآن ڈاکٹر طاہر القادری نے کہا ہے کہ تحقیق اور ماڈرن سائنسز پر دسترس ہی ترقی کا راستہ ہے۔

ڈاکٹر طاہر القادری نے برطانیہ میں پاکستانی کمیونٹی اور علماء کرام کی کانفرنس سے خطاب کرتے ہوئے کہا کہ اسلام جدت اور تحرک کی تعلیمات سے عبارت ہے۔

ان کا کہنا تھا کہ جب تک مسلمان جدید سائنس سے وابستہ رہے کائنات کے راز تلاش کرتے رہے، نئی نسل کو اسلاف کے علمی، روحانی، تحقیقی مزاج سے ہم آہنگ کرنا ہو گا۔

انہوں نے کہا کہ جب سے تحقیق کا راستہ چھوڑا ہے تو ہم اغیار کے دست نگر ہو کر رہ گئے، قرآن نے کائنات کے رازوں تک رسائی کیلئے تحقیق و تجسس کا حکم دیا ہے۔

طاہر القادری نے کہا کہ جو فکر شعور و آگہی کو منجمد کر دے وہ حقیقت نہیں ہو سکتی، کامیابی حاصل کرنا چاہتے ہیں تو زندگی میں اعتدال اور توازن پیدا کریں۔

ان کا یہ بھی کہنا تھا کہ نوجوان نسل جدید عصری علوم کے حصول پر توجہ دیں۔