کل سے مون سون سسٹم سندھ پر اثر انداز ہو سکتا ہے جبکہ کراچی میں آج بھی ہلکی بارش کا امکان ہے۔

اس حوالے سے محکمہ موسمیات کا کہنا ہے کہ شہر میں کل سے مون سون کا چوتھا اسپیل بارش برسائے گا جبکہ شہرقائد میں آج کم سے کم درجہ حرارت 28 ڈگری سینٹی گریڈ ریکارڈ کیا گیا۔

آج زیادہ سے زیادہ درجہ حرارت 36ڈگری سینٹی گریڈ ریکارڈ ہونے کا امکان ہے جبکہ ہوا میں نمی کا تناسب 85 فیصد ریکارڈ کیا گیا۔

محکمہ موسمیات نے بتایا کہ شہر میں سمندری ہوائیں معطل ہیں، اس وقت 12 کلو میٹر فی گھنٹہ کی رفتار سے مغربی ہوا چل رہی ہے۔

کراچی میں آج موسم مطلع جزوی ابر آلود رہے گا جبکہ صبح و شام کے اوقات میں ہلکی بارش کا امکان ہے۔

شہر میں کل سے گرج چمک کے ساتھ بارش کا امکان ہے اور بارش کا سلسلہ 9 اگست تک جاری رہے گا۔

کراچی سمیت سندھ بھر میں اگست میں بھی معمول سے زائد بارشوں کا امکان ہے، جبکہ کراچی میں یومِ عاشور پر بھی بارش ہو سکتی ہے۔

سندھ میں مزید دو مون سون سسٹم کی انٹری

محکمہ موسمیات کے مطابق سندھ سمیت کراچی میں دیگر دو مون سون سسٹم بارش برسائیں گے۔

پہلا سسٹم 6 اگست تا 9 اگست تک سندھ سمیت کراچی اور بلوچستان میں بارش برسائے گا اور اس دوران شہر میں گرج چمک کے ساتھ بارشوں کا امکان ہے جبکہ ہلکی تا درمیانےدرجے کی بارش کے ساتھ کچھ مقامات پر تیز بارش ہونے کا امکان ہے۔

دوسرا سسٹم 11 تا 13 اگست سندھ سمیت کراچی اور بلوچستان کو متاثر کرے گا اور اس دوران شدید موسلادھار بارشوں کا امکان ہے۔

نشیبی علاقے زیر آب آنے کا امکان ہے اور شہروں میں اربوں فلڈنگ کا بھی امکان ہے۔

محکمہ موسمیات نے اس دوران متعلقہ اداروں کو الرٹ رہنے کی ہدایت کی ہے۔

کراچی میں یومِ عاشور پر بارش کا امکان

چیف میٹرولوجسٹ سردار سرفراز نے میڈیا سے گفتگو کے دوران کہا تھا کہ کراچی میں 6 سے 9 اگست کے دوران درمیانی شدت کی بارشوں کا امکان ہے۔

سردار سرفراز نے بتایا تھا کہ مون سون کا سسٹم کل سے سندھ پر اثر انداز ہو سکتا ہے، جس کے تحت کراچی میں چند مقامات پر تیز بارش بھی ہو سکتی ہے۔

چیف میٹرولوجسٹ سردارسرفرازنے بتایا کہ مون سون کا ایک اور سسٹم 10 اگست سے سندھ پر اثر انداز ہو گا جس کے تحت 11 اگست سے کراچی میں بارش کا سلسلہ دوبارہ شروع ہو سکتا ہے۔

اس کے علاوہ  ملک کے بیشتر علاقوں میں موسم گرم اور مرطوب رہے گا، کشمیر،بالائی پنجاب،بالائی خیبرپختونخوا، سندھ، شمال اور مشرقی بلوچستان میں چند مقامات پر تیز ہواؤں اور گرج چمک کے ساتھ بارش کا امکان ہے۔

سندھ کا موسم

سندھ کے بیشتر اضلاع میں مطلع جزوی ابر آلود رہنے کے ساتھ سکھر، لاڑکانہ، جیکب آباد، دادو، شہید بینظیر آباد، میر پور خاص، ٹھٹہ، بدین، حیدرآباد اور کراچی میں تیز ہواؤں اورگرج چمک کے ساتھ بارش کا امکان ہے۔

ملتان کا موسم

ملتان میں آئندہ 24 گھنٹوں کے دوران موسم جزوی طور پر ابر آلود رہے گا جبکہ شہر میں گرج چمک کیساتھ ہلکی بارش کا امکان ہے۔

شہر میں آج درجہ حرارت زیادہ سے زیادہ 34 ڈگری سینٹی گریڈ تک رہنے کا امکان ہے جبکہ کم سے کم درجہ حرارت 29 عشاریہ 3 ڈگری سینٹی گریڈ ریکارڈ کیا گیا ہے۔

بلوچستان کا موسم

صوبے کے بیشتر اضلاع میں موسم موطوب رہنے گا، تاہم خضدار، ژوب، بولان، کوہلو، قلات، لسبیلہ، آوران، زیارت بارکھان اور محلقہ علاقوں میں تیز ہواؤں اور گرج چمک کے ساتھ بعض مقامات پر موسلادھار بارش کا امکان ہے۔

اسلام آباد کا موسم

اسلام آباد میں موسم گرم اور مرطوب رہنے کے علاوہ صبح کے اوقات میں تیز ہواؤں اورگرج چمک کے ساتھ بارش کا بھی امکان ہے۔

اسلام آباد میں زیادہ سے زیادہ درجہ حرارت 37 ڈگری سینٹی گریڈ تک رہنے کا امکان ہے جبکہ ہوا میں نمی کا تناسب 53 فیصد تک رہنے کا امکان ہے۔

پنجاب کا موسم

پنجاب کے بیشتر اضلاع میں موسم گرم اور  مرطوب رہنے کے علاوہ  خطہ پوٹھوہار، گوجرانوالہ، لاہور، ساہیوال، اوکاڑہ، سیالکوٹ، نارووال، منڈی بہاؤالدین، میانوالی، سرگودھا، فیصل آباد، خوشاب، ملتان، رحیم یار خان، بہاولپور، بہاولنگر اور ڈیرہ غازی خان میں  تیز ہواؤں اور گرج چمک کے ساتھ بارش کا امکان ہے۔