وزیراعلیٰ بلوچستان میر عبدالقدوس بزنجو نے سیلاب سے متاثرہ اضلاع کیلئے خصوصی ٹیموں کی تشکیل کا فیصلہ کیا ہے۔

وزیراعلیٰ میر عبدالقدوس بزنجو کی زیر صدارت اجلاس ہوا جس میں سیلاب سے متاثرہ علاقوں میں جاری امدادی سرگرمیوں نقصانات کے سروے سے متعلق امور کا جائزہ لیا گیا۔

ڈی جی پی ڈی ایم اے اور سیکریٹریوں نے اجلاس کو امدادی سرگرمیوں پر بریفنگ دی۔

اجلاس میں افسران پر مشتمل خصوصی ٹیموں کی تشکیل کا فیصلہ کیا گیا۔

فیصلے میں بتایا گیا کہ خصوصی ٹیمیں نقصانات کے سروے میں متاثرہ اضلاع کی انتظامیہ کو معاونت فراہم کرینگی، اقدام کا مقصد سروے کے کام کو مقررہ مدت کے اندر مکمل کرنا ہے۔

وزیراعلیٰ بلوچستان نے اجلاس میں ہدایت دی کہ ڈپٹی کمشنر نقصانات کا صیح تخمینہ لگا کر حقیقی ضروریات سے آگاہ کریں۔

میر عبدالقدوس بزنجو نے مزید کہا کہ سیلاب سے پورا صوبہ متاثر ہے ہم نے ہر ضلع کو دیکھنا ہے۔

واضح رہے کہ چیف سیکریٹری عبدالعزیز عقیلی سنئیر ممبر بورڈ آف ریونیو روشن علی شیخ اور متعلقہ محکموں کے سیکریٹریوں نے اجلاس میں شرکت کی۔

بلوچستان اور پنجاب کے سرحدی علاقوں میں سیلابی ریلوں سے متعدد دیہات زیرآب

بلوچستان اور پنجاب کے سرحدیعلاقوں میں سیلابی ریلوں نے تباہی مچادی ہے۔

سیلابی ریلوں سے  موسیٰ خیل، بارکھان اور  کوہلوکے علاقوں میں بڑے پیمانے پرنقصان ہوا، موسیٰ خیل میں اندرپوڑ ڈیم ٹوٹ گیا جس کے باعث  سیلابی پانی دیہاتوں میں داخل ہوگیا جب کہ ریلوں میں 12 افراد بہہ گئے جن میں سے 4 کی لاشیں نکال لی گئیں۔

موسیٰ خیل کا ملک بھر سے زمینی رابطہ منقطع ہوگیا

دوسری جانب  2 بڑے پل بہنے سے موسیٰ خیل کا ملک بھر سے زمینی رابطہ منقطع ہوگیا،  پنجاب اور بلوچستان کے سرحدی علاقوں میں مواصلاتی نظام بھی متاثر ہوا ہے۔

کوہ سلیمان اوربلوچستان سے آنے والےسیلابی ریلوں سےتونسہ کے10 سے زائد دیہات ڈوب گئے، دو مقامات پر رابطہ سڑکیں بہہ گئیں، قبائلی علاقوں کا تونسہ سے زمینی رابطہ منقطع ہو گیا۔

ادھر لہڑی ندی میں انتہائی اونچے درجے کا سیلاب ہے جب کہ مٹھوان میں متاثرین کو منتقل کرتے ہوئے ٹریکٹر ٹرالی ریلے میں الٹ گئی تاہم کوئی جانی نقصان نہیں ہوا۔

بلوچستان کو سندھ سےملانے والی ایم ایٹ شاہراہ ونگوہل کے مقام پر بہہ گئی  جس کے باعث  ہرقسم کی ٹریفک معطل ہو گئی۔

تونسہ اورراجن پور میں سیلاب زدہ علاقوں میں امدادی سرگرمیاں تیزکردی گئیں

کمشنر ڈی جی خان عثمان انور کا کہنا ہے کہ تونسہ اورراجن پور میں سیلاب زدہ علاقوں میں امدادی سرگرمیاں تیز کردی گئی ہیں، تونسہ کی سنگڑ ندی میں دو لاکھ کیوسک سے زائد کا ریلا آیا جس سے 10 دیہات زیر آب آگئے جب کہ انتظامیہ نے 280 افراد کو محفوظ مقام پر منتقل کردیا۔

یاد رہے کہ بلوچستان میں بارشوں اور سیلاب سے اموات کی مجموعی تعداد 196ہوگئی ہے۔