مسلم لیگ ن کے رہنما حمزہ شہباز نے کہا ہے کہ آئندہ آنے والے دنوں میں عمران خان بے نقاب ہوں گے۔
وزیرِ اعظم شہباز شریف کے صاحبزادے حمزہ شہباز نے احتساب عدالت کے باہر میڈیا سے گفتگو کرتے ہوئے کہا کہ کمر کے درد کی وجہ سے عدالت حاضر نہیں ہوتا رہا، طبیعت آہستہ آہستہ معمول پر آ رہی ہے۔
‘ملک کا تماشا بنادیا ہے’
انہوں نے کہا کہ یہ عمران خان کی روایت ہے کہ ہر بات سے پیچھے ہٹ جاتے ہیں، یہ کہتے تھے کہ خود کشی کر لوں گا مگر آئی ایم ایف سے قرض نہیں لوں گا۔
حمزہ شہباز نے کہا کہ انہوں نے قوم کا وقت ضائع کیا، عمران اپنے بیان سے پیچھے ہٹ رہے ہیں کیونکہ یہ بیانیہ انہیں “سوٹ” نہیں کرتا۔
انکا کہنا ہے کہ ایک سائفر تھا، آپ اداروں کیخلاف غلیظ زبان استعمال کرتے تھے آج آپ نے اس سے یوٹرن لے لیا ہے، یہ سیاست نہیں ہے بلکہ انہوں نے ملک کا تماشا بنا دیا ہے۔
‘یہ سب جھوٹ پر مبنی سیاست ہے’
لیگی رہنما نے کہا کہ یہ آج تک توشہ خانہ کا جواب نہیں دے سکے، کروڑوں روپے کمائے اور تحفے باہر بھیجے گئے، ایسا کیوں کیا؟ یہ قوم آپ سے پوچھتی ہے۔
انہوں نے کہا کہ فارن فنڈنگ کیس کا آپ آج تک جواب نہیں دے سکے، یہ سب جھوٹ پر مبنی سیاست ہے، ذاتی مفادات ہیں تا کہ کسی طرح اقتدار میں آجائیں، یہ اسی کی کوشش ہے۔
‘عمران خان کو سب چیزوں کا جواب دینا پڑے گا’
حمزہ شہباز نے کہا کہ وقت آہستہ آہستہ عمران خان کو اچھے طریقے سے بے نقاب کر رہا ہے، آئندہ آنے والے دنوں میں بھی عمران خان بے نقاب ہوں گے۔
انکا کہنا ہے کہ یہ چیزیں ڈھکی چھپی نہیں رہیں گی عمران خان کو ان کا جواب دینا پڑے گا، ایسے تو اسکول کے بچے نہیں کرتے جب چاہا بیانیہ بنا لیا کہ سازش ہوئی اور جب چاہیں کہہ دیں کہ میں اس سے پیچھے ہٹتا ہوں۔
لیگی رہنما نے مزید کہا کہ یہ ملک ان تماشوں کا متحمل نہیں ہو سکتا، آج معیشت جو انکا کیا دھرا ہے اس حکومت کو مشکل فیصلے کرنے پڑے، نومبر میں آرمی چیف کی تعیناتی ہونی ہے جو آئین اور قانون کے مطابق ہوگی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News