وزیر اعلیٰ بلوچستان میرعبدالقدوس بزنجو نے کہا ہے کہ صوبائی حکومت پولیو کے مکمل خاتمے کے لیے پرعزم ہے۔

تفصیلات کے مطابق وزیراعلیٰ بلوچستان میرعبدالقدوس بزنجو نے انسداد پولیو مہم پر پیغام جاری کرتے ہوئے کہا کہ انسداد پولیو کا مقصد ملک و معاشرے سے پولیو جیسے موذی مرض کا خاتمہ کرنا ہے جبکہ پولیو کے خاتمے کا مقصد اپنے بچوں کے مستقبل کو محفوظ بنانا ہے۔

انہوں نے کہا کہ پولیو کا بروقت علاج نہ ہونے کے باعث بچے عمر بھر کی معذوری کا شکار ہوتے ہیں جبکہ بہت سے ممالک نے پولیو  کو بھرپور محنت اور کوششوں کے ساتھ ختم کیا ہے، پولیو کا خاتمہ نا ممکن نہیں البتہ مشکل ضرور ہے جس کیلئے ہم سب کو مل کر کردار ادا کرنا ہوگا۔

ان کا کہنا تھا کہ پولیو مہم میں علمائے کرام، سول سوسائٹی اور مختلف مکاتب فکر سمیت میڈیا کا کردار کلیدی ہے جبکہ تمام مکتبہ فکر کے یکجا ہونے کی وجہ سے کسی حد تک اس بیماری پر قابو پانے میں ہم کامیاب ہو رہے ہیں۔

میرعبدالقدوس بزنجو نے کہا کہ ہم پولیو ورکرز کو ان کی انتھک محنت پر سلام پیش کرتے ہیں، پولیووائرس کے خاتمے کیلئے مستقل مزاجی کے ساتھ جدوجہد کی ضرورت ہے جبکہ بلوچستان میں جنوری سال 2021 سے اب تک پولیو کا کوئی کیس رپورٹ نہ ہونا خوش آئند ہے۔

انہوں نے کہا کہ ہمارا بھی مقصد یہی ہے کہ کس طرح سے اس موذی مرض کا خاتمہ یقینی ہوسکے تاکہ ہمارا ملک بھی پولیو سے پاک ہو جائے۔

 ان کا کہنا تھا کہ صوبائی حکومت پولیو کے مکمل خاتمے  کے لیے  پرعزم ہے۔

 وزیر اعلیٰ بلوچستان میرعبدالقدوس بزنجو نے مزید کہا کہ پولیو ورکرز کو پولیو مہم کے دوران مکمل سیکورٹی فراہم کی جائے گی۔