پاکستان تحریک انصاف (پی ٹی آئی) کا حکومت مخالف 26 نومبر کو حقیقی آزادی مارچ راولپنڈی کال کے معاملے پر چیئرمین عمران خان حکومت کو ٹف ٹائم دینے کی تیاریوں کے حوالے سے سرگرم ہیں۔

تفصیلات کے مطابق پاکستان تحریک انصاف (پی ٹی آئی) کے چیئرمین و سابق وزیراعظم عمران خان زمان پارک میں آج بھی مصروف دن گزاریں گے۔

پارٹی ذرائع نے بتایا کہ زمان پارک میں پی ٹی آئی کے چیئرمین عمران خان مختلف وفود اور پارٹی رہنماؤں سے ملاقاتیں کریں گے۔

سابق وزیراعظم عمران خان پارٹی رہنماؤں سے 26 نومبر کو راولپنڈی کال کے حوالے سے مشاورت کریں گے اور اہم نکات پر تبادلہ خیال بھی کریں گے۔

 اس موقع پر پارٹی رہنماؤں سے حکومت کے خلاف فیصلہ کن مرحلے کی تیاریوں پر بھی غور ہوگا۔

اسکے علاوہ پی ٹی آئی کے چیئرمین عمران خان کا آج شوکت خانم اسپتال کے ڈاکٹرز کی ٹیم طبعی معائنہ بھی کرے گی۔

خیال رہے کہ زمان پارک میں پی ٹی آئی کے چیئرمین عمران خان کی حفاظت کے لیے سیکیورٹی کے سخت انتظامات کردیے گئے ہیں۔

واضح رہے کہ تحریک انصاف کا دوسرے مرحلے کا جاری لانگ مارچ 26 نومبر تک کے لیے مؤخر کر دیا گیا۔ پی ٹی آئی کے تمام مرکزی اور صوبائی رہنما اپنے اپنے حلقوں میں 26 نومبر کے لیے تیاریاں کریں گے۔

 25 نومبر کو عمران خان زمان پارک سے اسلام آباد کے لیے روانہ ہوں گے اور اسلام آباد پہنچنے پر دھرنے یا جلسے کا فیصلہ کیا جائے گا۔ اس کے بعد اسلام آباد دھرنے یا جلسے کی جگہ پر قیام کے لیے خیمہ بستی قائم کی جائے گی۔

علاوہ ازیں اسلام آباد دھرنے یا جلسے کی کامیابی کے لیے آئندہ چند روز میں ایک اعلیٰ سطحی کمیٹی بھی قائم کی جائے گی، دھرنے یا جلسے کے لیے دو مقامات زیر غور ہیں، کارکنان کی سہولت اور قیادت کے فیصلے کے پیش نظر حتمی مقام کا تعین کیا جائے گا۔

یاد رہے کہ پاکستان تحریک انصاف کے چیئرمین عمران خان نے 26 نومبر کو راولپنڈی پہنچنے کی کال دی ہے۔

تحریک انصاف کی لیڈر شپ میٹنگ آج طلب

دوسری جانب پی ٹی آئی کے رہنما فواد چوہدری نے نے بتایا کہ تحریک انصاف کی لیڈر شپ میٹنگ آج طلب کی جا رہی ہے۔

فواد چوہدری نے کہا کہ عمران خان کی صدارت میں ہونے والی اس ملاقات میں سیاسی صورتحال، حقیقی آزادی مارچ کے راولپنڈی مرحلے اور دیگر معاملات پر گفتگو ہو گی۔

 پی ٹی آئی کے رہنما نے مزید کہا کہ ملک کا معاشی بحران اور اس سے پیدا ہونے والی صورتحال بھی زیر گفتگو ہوگی۔