پی ٹی آئی کے مرکزی رہنما حلیم عادل شیخ نے کہا ہے کہ پاکستان تحریک انصاف (پی ٹی آئی) کے چیئرمین اور سابق وزیراعظم عمران خان پر حملے کے کیس  میں سابق آئی جی پنجاب کا نام ای سی ایل میں ڈال کر شامل تفتیش کیا جائے۔

قائد حزب اختلاف سندھ اسمبلی حلیم عادل شیخ نے اپنے جاری کردہ بیان میں کہا کہ عمران خان پر حملے کے بعد سابق آئی جی پنجاب نے غیرذمہ داری اور غیرقانونی عمل کا مظاہرہ کیا۔

انہوں نے کہا کہ عمران خان قتل سازش کیس میں سابق آئی جی پنجاب کا نام ای سی ایل میں ڈال کر شامل تفتیش کیا جائے۔

حلیم عادل شیخ نے مزید کہا کہ کوئی بھی شخص اس ملک اور قانون سے بالاتر نہیں، خود کو اداروں سے بالاتر سمجھنے والوں کا احتساب لازم ہے۔

پنجاب کابینہ نے آئی جی پنجاب پر عدم اعتماد کا اظہار کر دیا

خیال رہے کہ  عمران خان پر قاتلانہ حملے کے کیس پر آئی جی پنجاب فیصل شاہکار عہدے سے فارغ ہو گئے تھے۔

 پنجاب حکومت نے انسپکٹر جنرل پنجاب فیصل شاہکار کو سیرنڈر کر دیا اور ان پر عدم اعتماد کا اظہار کیا تھا۔

کابینہ ذرائع کا کہنا تھا کہ وزیرآباد واقعے کے حوالے سے آئی جی پنجاب کا رویہ افسوس ناک رہا، اتنے بڑے واقع کا مقدمہ درج کرنے میں لعیت و لعل سے کام لیا گیا، تحریک انصاف کی درخواست کے برعکس مقدمہ درج کیا گیا ہے۔

کابینہ نے تشویش کا اظہار کیا کہ ملزم نوید کا بیان کیسے لیک ہوا؟ نئے آئی جی کی تعیناتی تک چارج پنجاب کے سینئر پولیس آفیسر کے پاس رہے گا۔

عمران خان پر حملے کا کیس، پنجاب حکومت نے جےآئی ٹی تشکیل دے دی

دو روز قبل پاکستان تحریک انصاف (پی ٹی آئی) کے چیئرمین اور سابق وزیراعظم عمران خان پر حملے کے کیس سے متعلق پنجاب حکومت نے جے آئی ٹی تشکیل دے دی تھی اور محکمہ داخلہ پنجاب نے جے آئی ٹی کی تشکیل کا نوٹیفکیشن بھی جاری کردیا تھا۔

نوٹیفکیشن کے مطابق ڈی آئی جی طارق رستم چوہان جے آئی ٹی کے کنوینر مقرر کیے گئے تھے، جبکہ آر پی او ڈی جی خان سید خرم علی کو جے آئی ٹی کا رکن مقرر کیا گیا تھا۔

نوٹیفکیشن کے مطابق اے آئی جی انویسٹی گیشن پنجاب احسان اللّٰہ چوہان کو جے آئی ٹی کا ممبر مقرر کیا گیا، ڈی پی او  وہاڑی ظفراللّٰہ بزدار کو جے آئی ٹی کا ممبر مقرر کیا گیا۔

اعلامیے کے مطابق ایس پی سی ٹی ڈی نصیب اللّٰہ خان بھی جے آئی ٹی کے ممبر مقرر کیے گئے، جے آئی ٹی وزیر آباد میں عمران خان پرحملہ کیس کی تحقیقات کرے گی۔