سیکرٹری جنرل پی ٹی آئی اسد عمر نے کہا ہے کہ پچھلے سات مہینوں میں ملک کی معیشت کا بُرا حال ہوا ہے۔

تفصیلات کے مطابق سیکرٹری جنرل پاکستان تحریک انصاف اسد عمر نے کارنر میٹنگ سے خطاب کرتے ہوئے کہا کہ ملک کیلئے دو راستے ہیں ایک جو پچھتر سال سے چلتا آیا ہے اور دوسرا آزادی کا راستہ ہے جبکہ 26  تاریخ کا دن پاکستان کی تاریخ میں یاد رکھا جائے گا۔

انہوں نے کہا کہ بند کمروں میں کئے جانے والے فیصلوں سے ملک کا نقصان ہوا ہے، پاکستان کے فیصلے پاکستان کی عوام کیلئے نہیں ہوئے ہیں جبکہ پچھلے سات مہینوں میں ملک کی معیشت کا بُرا حال ہوا ہے۔

ان کا کہنا تھا کہ 26 نومبر پاکستان کیلئے اہم دن ہے اور پنڈی والے خوش قسمت ہیں یہ معرکہ پنڈی میں کھیلا جائے گا۔

اسد عمر نے کہا کہ گولی کھانے کے باوجود خان پنڈی آرہا ہے اور پنڈی والے خان کا ہر اوّل دستہ بنیں گے جبکہ پوری قوم نے پچھلے سات ماہ میں دلیری دکھائی ہے۔

انہوں نے کہا کہ عمران خان کی جان کو شدید خطرہ ہے لہذا فُول پروف سیکورٹی کے انتظامات کر رہے ہیں۔

ان کا کہنا تھا کہ دھرنے کے مقام کیلئے ابھی فیصلہ نہیں ہوا ہے جبکہ انتظامیہ کے ساتھ ابھی پھر میٹنگ ہے اس میں فیصلہ ہوگا۔

 سیکرٹری جنرل پاکستان تحریک انصاف اسد عمر نے مزید کہا کہ دھرنے کا مقام مری روڑ ہی ہے لیکن جگہ کا تعین انتظامیہ کے ساتھ میٹنگ کے بعد ہوگا۔