وزیراعلیٰ گلگت بلتستان خالد خورشید نے کہا ہے کہ جون تک نلتر ایکپریس وے کا تعمیری کام مکمل ہو جائے گا۔

تفصیلات کے مطابق وزیراعلیٰ گلگت بلتستان خالد خورشید نے گاؤں نومل ضلع گلگت کا دورہ کیا ہے جس میں انہیں سال 2021-22 میں منظور کردہ گاؤں نومل کے خصوصی منصوبہ جات 10 بیڈڈ ہسپتال اور واٹر سپلائی سکیم پر عملدرآمد کے حوالے سے بریفینگ دی گئی جبکہ انہیں نلتر ایکپریس وے کی تعمیر کے حوالے سے بھی بریفنگ دی گئی۔

وزیراعلیٰ گلگت بلتستان خالد خورشید نے کہا کہ واٹر سپلائی اسکیم اور 10 بیڈڈ ہسپتال انتہائی اہمیت کے حامل منصوبے ہیں جبکہ دونوں منصوبہ جات عوام کے مطالبے اور ان کے مفاد کو مدنظر رکھتے ہوئے خصوصی طور پر منظور کئے گئے ہیں۔

اس موقع پر وزیراعلیٰ گلگت بلتستان نے حکام کو دونوں منصوبہ جات کی تعمیر معیار یقینی بناتے ہوئے مقررہ وقت میں مکمل کرنے کی ہدایت کی اور واٹر سپلائی اسکیم کو فیض آباد نومل تک توسیع دینے کا اعلان بھی کیا۔

وزیراعلیٰ نے فیض آباد گاؤں نومل کے حفاظتی بند کی تعمیر کی سائٹ کا معائنہ بھی کیا اور متعلقہ حکام کو اس کی تعمیر کے حوالے سے فوری اقدامات اٹھانے کی ہدایت بھی کی۔

اس موقع پر وزیراعلیٰ نے اس عزم کا اعادہ کیا کہ آمدہ جون تک نلتر ایکپریس وے کہ تعمیر کا کام مکمل کرایا جائے گا جبکہ وفاقی حکومت کی جانب سے بجٹ کٹوتی اور فنڈ کی ریلیز میں تاخیر سے اہم منصوبہ جات التواء کا شکار ہورہے ہیں۔

 اہلیان نومل نے عوام کے دیرینہ مطالبے کو حل کرکے پانی اور ہسپتال کے منصوبہ جات منظور کرنے پر وزیراعلیٰ خالد خورشید کو خراج تحسین پیش کیا اور صوبے کی ترقی کے حوالے سے وزیراعلیٰ کی کاوشوں کو بھی سراہا۔

اس موقع پر وزیراعلیٰ گلگت بلتستان خالد خورشید کے ہمراہ وزیر تعمیرات وزیر سلیم، وزیر صحت حاجی گلبر خان ، معاون خصوصی الیاس صدیقی، و دیگر  متعلقہ حکام  بھی موجود تھے۔