بلیغ الرحمان نے کہا ہے کہ ہم دنیا میں کتاب پڑھنے والوں کی فہرست میں بہت پیچھے ہیں۔

تفصیلات کے مطابق گورنر پنجاب بلیغ الرحمان نے کراچی میں تقریب سے خطاب کرتے ہوئے کہا کہ میرے لئے اعزاز کی بات ہے کہ میں مرزا اشتیاق بیگ کی کتاب کی رونمائی میں موجود ہوں۔

انہوں نے کہا کہ کتاب انسان کی بہترین دوست ہے، مجھے نصاب تعلیم پر کام کرنے کا موقع ملا ہے۔

ان کا کہنا تھا کہ ہم چاہتے ہیں کہ بچوں کے بستے کم وزنی ہوں، کتاب پڑھنے والوں کی تعداد پاکستان میں بہت کم ہے جبکہ ہم دنیا میں کتاب پڑھنے والوں کی فہرست میں بہت پیچھے ہیں۔

 بلیغ الرحمان نے کہا کہ مجھ سے سوال ہوا کہ کیا دینی تعلیم دینا حکومت کی ذمہ داری نہیں ہے؟ جبکہ ہم نے قرآن کی تعلیم کا سرکاری سطح پر اہتمام کیا ہے۔

انہوں نے کہا کہ پی ٹی آئی نے آج گورنر ہاؤس لاہور کے سامنے احتجاج کا اعلان کیا ہے، پی ٹی آئی والوں نے ٹائر جلا کر گورنر ہائوس کے اندر پھینکے جبکہ گورنر ہائوس کے دروازے کو بھی پی ٹی آئی والوں نے نقصان پہنچایا ہے۔

ان کا کہنا تھا کہ احتجاج کو قومی املاک کو نقصان پہنچانا درست نہیں ہے، اسلام آباد کے راستوں میں درخت کاٹ کر جلائے گئے ہیں۔

گورنر پنجاب بلیغ الرحمان نے مزید کہا کہ انہوں نے گورنر ہاؤس لاہور کی سیکیورٹی کے حوالے سے احکامات دے دئیے ہیں۔