سردار تنویر الیاس خان نے کہا ہے کہ آزاد کشمیر میں 32 سال کے بعد بلدیاتی انتخابات کا انعقاد ہونے جا رہا ہے۔
تفصیلات کے مطابق آزاد حکومت ریاست جموں وکشمیر کے وزیراعظم سردار تنویر الیاس خان سے سینیٹر سلیم مانڈوی والا کی وزیراعظم ہاؤس مظفرآباد میں ملاقات ہوئی ہے جس میں آزاد کشمیر کے آمدہ بلدیاتی انتخابات، مالیاتی امور، ترقیاتی عمل اور پی ایس ڈی پی کے منصبوبہ جات کے حوالہ سے تبادلہ خیال کیا گیا ہے۔
اس موقع پر سردار تنویر الیاس خان نے کہا کہ حکومت آزاد کشمیر تعمیر وترقی کے لیے بھرپور اقدامات کر رہی ہے جبکہ آزاد کشمیرکے اندر 32 سال کے بعد بلدیاتی انتخابات کا انعقا د بھی ہونے جا رہا ہے۔
حکومت آزاد کشمیر کی توقع ہے کہ وفاقی حکومت آزاد کشمیر کی تعمیر و ترقی اور بلدیاتی انتخابات کے انتظامات کے سلسلہ میں آزاد کشمیر حکومت کے ساتھ تعاون کرے گی جبکہ اپوزیشن کی جماعتیں وفاقی حکومت کو سیکیورٹی نہ دینے کا بول رہی ہیں۔
سردار تنویر الیاس نے کہا کہ مظفرآباد کی خوبصورتی کے لیے ماسٹر پلان تیار ہے جبکہ آزاد کشمیر کے مختلف پراجیکٹ وفاقی حکومت کی طرف سے بجٹ میں کٹوتی کے باعث التواء کا شکار ہیں۔
انہوں نے کہا کہ آزاد کشمیر کے حالیہ جاری پبلک سیکٹر ڈویلپمنٹ پروگرام کے منصوبے جو کہ مکمل نہیں ہوئے ان کومکمل کرنے کے لیے وفاقی حکومت آزاد کشمیر حکومت کے ساتھ تعاون کرے۔
اس موقع پر سینیٹر سلیم مانڈوی والا نے وزیراعظم آزاد کشمیر کو یقین دلایا کہ آزادکشمیر کے مالیاتی مسائل کا معاملہ وہ وفاقی حکومت سے اٹھائیں گے اور اس سلسلہ میں اپنا بھرپور کردار ادا کریں گے۔
وزیراعظم سردار تنویر الیاس نے کہا کہ وفاقی حکومت نے آزاد کشمیر پی ایس ڈی پی کے منصوبے نامکمل چھوڑ ے ہیں اور ترقیاتی بجٹ میں کٹوتی کے باعث تعمیر وترقی کا عمل سست روی کا شکار ہے، وفاقی حکومت آزاد کشمیر میں پی ایس ڈی پی کے منصوبے مکمل کرے تاکہ آزاد خطہ کی بحالی و تعمیر نو کا کام مکمل ہو سکے۔
انہوں نے کہا کہ آزاد کشمیر میں سیاحت کا بہت پوٹینشل ہے، حکومت کی کوشش ہے کہ سیاحت کو انڈسٹری کا درجہ دے کر اس میں زیادہ سے زیادہ سرمایہ کاری کروائی جائے تاکہ ریاست کی آمدن بھی بڑے اور لوگوں کو مقامی سطح پر روزگار کے مواقعے میسر آئیں۔
ان کا کہنا تھا کہ سیاحت کے شعبہ سے آزاد کشمیر کا مستقبل منسلک ہے جبکہ اس سلسلہ میں حکومت آزاد کشمیر نے اپنی جانب سے بجٹ میں خطیر رقم بھی مختص کی ہے تاہم ترقیاتی فنڈز میں کمی کے باعث حکومت کو مسائل کا سامنا ہے۔
وزیراعظم آزاد حکومت ریاست جموں وکشمیر سردار تنویر الیاس نے مزید کہا کہ آزاد کشمیرمیں گزشتہ تین دھائیوں سے انتخابات نہیں ہوئے، پی ٹی آئی نے اپنے انتخابی منشور میں عوام سے وعدہ کیا تھا کہ بلدیاتی انتخابات کروا کر اقتدار نچلی سطح پر منتقل کیا جائے گا جس کو عملی جامہ پہناتے ہوئے حکومت بتیس سال بعد اقتدار نچلی سطح پر منتقل کرنے جارہی ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News