مبین جتوئی نے کہا ہے کہ عمران خان ہی جو سندھ کو ترقی کے راستے پر لے جا سکتے ہیں۔

تفصیلات کے مطابق وزیر اعلیٰ اور گورنر سندھ کی ملاقات پر پی ٹی آئی جنرل سیکریٹری سندھ مبین جتوئی نے رد عمل دیتے ہوئے کہا کہ ایم کیو ایم اور پی پی کے درمیان وسائل اور عہدوں کی بندر بانٹ جاری ہے۔
انہوں نے کہا کہ چیف منشی اور پیراشوٹر گورنر سندھ کے عوام کو بے وقوف بنا رہے ہیں۔

ان کا کہنا تھا کہ ایم کیو ایم اور پی پی کی “آؤ مل کر کھاتے ہیں” کی سیاست عوام اچھی طرح جانتے ہیں، ایم کیو ایم نورا کشتی کے بجائے سندھ اسمبلی میں ٹریژری بنچوں پر بیٹھے ہیں۔

 مبین جتوئی نے کہا کہ دونوں جماعتیں سندھ کے وسائل پر کئی دہائیوں سے قابض ہیں، ایم کیو ایم اور پی پی کے معاہدے ڈرامہ، یہ بلدیاتی انتخابات کے حق میں نہیں ہیں۔

انہوں نے کہا کہ بلدیاتی انتخابات ہوتے تو دونوں جماعتوں کو اپنی حیثیت معلوم ہو جاتی، ایم کیو ایم نے سندھ کے شہری اور پی پی نے دیہی علاقوں کی تباہی میں کوئی کثر نہیں چھوڑی ہے جبکہ ان دونوں جماعتوں نے سندھ کو محرومیوں کے سوا کچھ نہیں دیا ہے۔

ان کا کہنا تھا کہ سندھ کے عوام اب مسائل کے حل کے لیے پی ٹی آئی اور عمران خان کی طرف دیکھ رہے ہیں جبکہ حقیقی آزادی کی جدوجہد میں سندھ کے عوام بڑھ چڑھ کر حصہ لے رہے ہیں۔

     جنرل سیکریٹری سندھ مبین جتوئی نے مزید کہا کہ عمران خان واحد لیڈر ہیں جو سندھ کو محرومیوں سے نکال کر ترقی کے راستے لے جا سکتے ہیں۔