گورنر سندھ کامران ٹیسوری نے کہا ہے کہ ملک کے معاشی اور سیاسی حالت بہتر نہیں ہیں۔

تفصیلات کے مطابق گورنر سندھ کامران ٹیسوری نے تقریب سے خطاب کرتے ہوئے کہا کہ مخلتف شعبوں میں کام کرنے والے خراج تحسین کے مستحق ہیں جبکہ ریاست کے کرنے والے کام بھی افراد اکیلے کرتے ہیں۔

انہوں نے کہا کہ آگ سے بچاؤ کا سسٹم نہ لگا کر ہم اپنی اور بچوں کی زندگی سے کھیل رہے ہیں، مانتا ہوں ریاست نے کچھ نہ دیا ہو مگر ریاست کو ہم نے کیا دیا ہے؟

ان کا کہنا تھا کہ ہم دن بھر سیاسی بات کرتے ہیں مگر اپنی حفاظت پر ہم بات نہیں کرتے ہیں جبکہ ملک کے معاشی حالت بہتر نہیں ہیں اور معاشی کے ساتھ سیاسی حالات بھی اچھے نہیں ہیں۔

 ان کا یہ بھی کہنا تھا کہ ہمیں غلطیوں سے سیکھ کر آگے بڑھنا ہوگا، ساٹھ ستر سالوں سے ہمارے سارے پروجیکٹ فائلوں میں دفن ہیں، ابھی تک ہم پوچھ رہے کہ کالا باغ بنے گا یا نہیں، لوگ پوچھ رہے ہیں کہ کے فور بنے گا یا نہیں۔

گورنر سندھ کامران ٹیسوری نے مزید کہا کہ میں فائلوں میں گم ہونے کے بجائے عوام کے مسائل کے حل کے لیے کوشاں رہوں گا اور اگر عوام کے درد کو ختم نہ کرسکا تو انکے درد بانٹنے کی کوشش کروں گا۔